ប្រទេសកាណាដាបានលុបចោលកាតព្វកិច្ចពន្ធសេវាកម្មឌីជីថល (DST) របស់ខ្លួន ដែលដាក់លើក្រុមហ៊ុនបច្ចេកវិទ្យានានា ដូចជា Meta Platforms និង Alphabet ជាដើម ជាចំណាត់ការ ដើម្បីចាប់ផ្តើមកិច្ចពិភាក្សាពាណិជ្ជកម្មឡើងវិញជាមួយសហរដ្ឋអាមេរិក។

តាមរយៈការបង្ហោះ នៅលើបណ្ដាញសង្គម កាលពីថ្ងៃអាទិត្យ (ទី២៩ ខែមិថុនា) រដ្ឋមន្ត្រីក្រសួងហិរញ្ញវត្ថុ Francois-Philippe Champagne បានឲ្យដឹងថា៖ «ការលុបចោល DST នឹងអាចឲ្យការចរចាមាននូវវឌ្ឍនភាពដ៏សំខាន់ និងពង្រឹងការងាររបស់យើង ដើម្បីបង្កើតការងារ និងកសាងវិបុលភាព សម្រាប់ប្រជាជនកាណាដាគ្រប់រូប»។

សូមបញ្ជាក់ថា កាលពីរសៀលថ្ងៃទី២៧ ខែមិថុនា ប្រធានាធិបតីអាមេរិក លោក Donald Trump បានបញ្ជាក់ថា លោកកំពុងបញ្ចប់កិច្ចពិភាក្សាពាណិជ្ជកម្មទាំងអស់ជាមួយកាណាដា ដែលជាដៃគូពាណិជ្ជកម្មដ៏ធំបំផុតមួយរបស់ខ្លួន ដើម្បីជាការសងសឹក ចំពោះពន្ធឌីជីថល។ លោកក៏បានគំរាមដាក់អត្រាពន្ធថ្មី ក្នុងរង្វង់មួយសប្តាហ៍។

តែបើយោងតាមសេចក្តីថ្លែងការណ៍មួយ បានឲ្យដឹងថា ផ្ទុយទៅវិញ លោក Trump និងនាយករដ្ឋមន្ត្រីកាណាដា លោក Mark Carney បានព្រមព្រៀងគ្នាថា ប្រទេសទាំង២ នឹងចាប់ផ្តើមការចរចាឡើងវិញ ហើយព្យាយាមយល់ព្រមលើកិច្ចព្រមព្រៀងមួយនៅថ្ងៃទី២១ ខែកក្កដា។

សម្រាប់ប្រទេសកាណាដា ផលប៉ះពាល់ផ្នែកសេដ្ឋកិច្ច សម្រាប់ការពិភាក្សាទាំងនោះ មានទំហំធំ។ ប្រហែល ៣ភាគ៤នៃការនាំចេញរបស់ប្រទេសនេះ គឺទៅកាន់សហរដ្ឋអាមេរិក ក្នុងរួមទាំងប្រេងភាគច្រើន និងទំនិញជាច្រើនទៀត ក៏ដូចជារថយន្ត និងឡានដឹកទំនិញភាគច្រើនដែលខ្លួនផលិតផងដែរ។

សម្រាប់ពន្ធឌីជីថលរបស់កាណាដា ការទូទាត់លើកដំបូងត្រូវបានសន្មត់ថា នឹងមាននៅថ្ងៃទី៣០ ខែមិថុនា។ កាតព្វកិច្ចពន្ធដែលត្រូវបានអនុម័ត ក្នុងឆ្នាំ២០២៤ ដោយរដ្ឋាភិបាលមុនរបស់អតីតនាយករដ្ឋមន្ត្រី លោក Justin Trudeau មានន័យថា យកចំនួន ៣ភាគរយនៃប្រាក់ចំណូលសេវាកម្មឌីជីថលដែលក្រុមហ៊ុនទទួលបានពីអ្នកប្រើប្រាស់កាណាដាលើសពី ២០លានដុល្លារកាណាដា (១៤,៦លានដុល្លារងាមេរិក) ក្នុងមួយឆ្នាំ៕