រដ្ឋមន្ត្រីការបរទេសអាល្លឺម៉ង់ លោក Johann Wadephul បានធ្វើទស្សនកិច្ចដោយមិនប្រកាសមួយ ទៅកាន់ទីក្រុងគៀវ នៅថ្ងៃចន្ទនេះ ក្នុងការបង្ហាញការបន្តគាំទ្រចំពោះការប្រយុទ្ធរបស់អ៊ុយក្រែន ដើម្បីទប់ទល់នឹងការឈ្លានពានរបស់រុស្ស៊ី ខណៈដែលកិច្ចខិតខំប្រឹងប្រែងសន្តិភាពអន្តរជាតិដឹកនាំដោយសហរដ្ឋអាមេ  រិក បរាជ័យក្នុងការធ្វើឲ្យមានការរីកចម្រើន។

លោក Wadephul បានគ្រោងជួបជាមួយប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelensky ) និងរដ្ឋមន្ត្រីការបរទេសអ៊ុយក្រែនលោក Andrii Sybiha ។

លោក Wadephul បាននិយាយនៅក្នុងសេចក្តីថ្លែងការណ៍មួយថា អាល្លឺម៉ង់ នឹងជួយអ៊ុយក្រែន «បន្តការពារខ្លួន ដោយជោគជ័យ ជាមួយនឹងប្រព័ន្ធការពារដែនអាកាសដ៏ទំនើប និងសព្វាវុធផ្សេងទៀត ជាមួយនឹងជំនួយមនុស្សធម៌ និងសេដ្ឋកិច្ច»។

អាល្លឺម៉ង់ គឺជាអ្នកគាំទ្រយោធាធំទីពីររបស់អ៊ុយក្រែន បន្ទាប់ពីសហរដ្ឋអាមេរិក ដែលការបន្តគាំទ្ររបស់ពួកគេ គឺស្ថិតក្នុងភាពមិនច្បាស់លាស់។

ទោះជាយ៉ាងណាក៏ដោយ ទីក្រុងប៊ែរឡាំង បានបដិសេធចំពោះការស្នើសុំរបស់លោក ហ្សេឡិនស្គី ឲ្យផ្តល់ឲ្យ អ៊ុយក្រែននូវមីស៊ីលរយៈចម្ងាយឆ្ងាយ Taurus ដែលផលិតដោយអាល្លឺម៉ង់ និងស៊ុយអែតដ៏មានឥទ្ធិពល។ នោះ គឺដោយសារតែការភ័យខ្លាចថា ការសម្រេចបែបនេះ អាចធ្វើឲ្យវិមានក្រឹមឡាំងខឹងសម្បារ និងបញ្ចប់ការអូសទាញអង្គការណាតូ ទៅក្នុងជម្លោះដ៏ធំបំផុតរបស់អឺរ៉ុប ចាប់តាំងពីសង្គ្រាមលោកលើកទី២មក។