បាល់ទាត់៖ លោក ភា សុភ័ក្ដ្រា គ្រូជំនួយក្រុមជម្រើសជាតិកម្ពុជាបានអះអាងថា លោកមិនសូវចាប់អារម្មណ៍ ឬភ្ញាក់ផ្អើលនឹងលទ្ធផលចាប់ឆ្នោតការប្រកួតជើងឯកយុវជនអាស៊ីអាគ្នេយ៍អាយុក្រោម ២៣ឆ្នាំ AFF U23 Championship 2022 នោះទេ ពិសេសក្រុមដែលស្ថិតក្នុងពូលជាមួយកម្ពុជា ដ្បិតក្នុងនាមអ្នកបច្ចេកទេសគឺផ្ដោតសំខាន់លើការរៀបចំក្រុម ដើម្បីអភិវឌ្ឍន៍កម្រិតសមត្ថភាពកីឡាករឲ្យកាន់តែរីកចម្រើន។
ការគូសបញ្ជាក់បែបនេះ បន្ទាប់ពីសហព័ន្ធកីឡាបាល់ទាត់អាស៊ីអាគ្នេយ៍ (AFF) បានរៀបចំពិធីចាប់ឆ្នោតប្រកួតពានរង្វាន់ AFF U23 Championship 2022 ដែលកម្ពុជានឹងធ្វើជាម្ចាស់ផ្ទះកាលពីថ្មីៗ ដោយម្ចាស់ផ្ទះកម្ពុជាស្ថិតក្នុងពូល A ជាមួយទីម័រខាងកើត ហ្វីលីពីន និងព្រុយណេ។ លទ្ធផលនេះត្រូវបានអ្នកគាំទ្រមានសុទិដ្ឋិនិយមថា ក្រុមគោព្រៃជំទង់កម្ពុជាមានសង្ឃឹមច្រើនដើម្បីឈានទៅវគ្គបន្ដ។ ប៉ុន្ដែលោក ភា សុភ័ក្ដ្រា បានបញ្ចេញទស្សនៈផ្ទាល់ខ្លួនថា ក្នុងនាមអ្នកបច្ចេកទេស អ្វីដែលត្រូវគិតគឺការរៀបចំក្រុមឲ្យបានល្អ ហើយដើម្បីអភិវឌ្ឍន៍កម្រិតសមត្ថភាពក្រុមឲ្យឈានឡើង ពោលគឺអាចនិយាយបានថា ការជ្រើសរើសកីឡាករដែលជាសក្ដានុពល U23 លើកនេះគឺសម្រាប់ត្រៀមស៊ីហ្គេមឆ្នាំ២០២២ នៅវៀតណាមផង និងស៊ីហ្គេមឆ្នាំ២០២៣ នៅកម្ពុជា ដើម្បីឲ្យពួកគេកាន់តែវិវឌ្ឍន៍ខ្លួនបានល្អតាមរយៈការយល់ពីរបៀបលេង ចិត្តសាស្ដ្រនៃកលល្បិច ទាំងការគៀបសង្កត់លើគូប្រកួត ការហ៊ានលេងពីអ្នកចាំទី ការរក្សាបាល់ និងបង្កើតឱកាសប្រយុទ្ធជាដើម។ អ្វីដែលពិសេសគឺការផ្ដោតនូវិធីសាស្ដ្រល្អៗ អំពីការហ្វឹកហាត់កម្លាំងកាយសម្បទា ដែលទាំងនេះគឺជាអ្វីដែលយើងត្រូវផ្ដោត ហើយប្រសិនបើយើងធ្វើបានល្អនោះ លទ្ធផលក្នុងកម្មវិធីនេះក៏ច្បាស់ជាទទួលបានទៅតាមហ្នឹងដែរ។ នេះបើតាមការបញ្ជាក់បន្ថែមរបស់លោក ភា សុភ័ក្ដ្រា។
ពាក់ព័ន្ធនឹងការយល់ឃើញរបស់មហាជនមួយចំនួន ដែលរំពឹងខ្ពស់ទៅលើលទ្ធផលក្នុងពូលវិញ ត្រូវបានគ្រូជំនួយក្រុមជម្រើសជាតិកម្ពុជាដដែលថា ក៏អាចជាទស្សនៈនៃការយល់ឃើញរបស់ពួកគេដែរ ព្រោះប្រហែលមកពីពួកគេមើលឃើញ អំពីការប្រើប្រាស់កីឡាករយុវជនក្នុងកម្មវិធីធំៗជាច្រើន ហើយលោកផ្ទាល់ក៏មានការរំពឹងទុកដូចមហាជនមួយចំនួននោះដែរ ប្រសិនបើកីឡាករនៅរក្សាអ្វីដែលធ្វើបានកន្លងមក។ សូមបញ្ជាក់ថា ពានរង្វាន់ AFF U23 Championship 2022 នៅកម្ពុជានឹងចាប់ផ្ដើមការប្រកួតពីថ្ងៃទី១៤ ដល់ថ្ងៃទី២៦ ខែកុម្ភៈ ឆ្នាំ២០២២ ខាងមុខនៅទីលានចំនួន ២ គឺពហុកីឡដ្ឋានជាតិមរតកតេជោ និងកីឡដ្ឋានព្រីនស៍។ ព្រឹត្តិការណ៍ប្រចាំតំបន់នេះមាន ១១ក្រុមចូលរួម និងបែងចែកជា ៣ពូល ក្រៅពីពូល A ដែលមានម្ចាស់ផ្ទះកម្ពុជា ទីម័រខាងកើត ហ្វីលីពីន និងព្រុយណេ គឺមានពូល B មានក្រុមឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ និងពូល C មានថៃ វៀតណាម និងសិង្ហបុរី៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
