ឧត្តមសេនីយ៍ឯកYousef Huneiti ប្រធានអគ្គសេនាធិការចម្រុះ នៅហ្ស៊កដានី បានជួបសមភាគីអាមេរិក លោកឧត្តមសេនីយ៍ Dan Caine ដើម្បីពិភាក្សាអំពីកិច្ចសហប្រតិបត្តិការ និងការសម្របសម្រួលផ្នែកយោធា រវាងកងកម្លាំងប្រដាប់អាវុធនៃប្រទេសទាំងពីរ ក្នុងអំឡុងកិច្ចប្រជុំ នៅទីក្រុងអាម៉ាន( Amman)។

យោងតាមទីភ្នាក់ងារសារព័ត៌មាន Petra បានឲ្យដឹងថា កិច្ចពិភាក្សានេះ បានលើកឡើងពីទិដ្ឋភាពប្រតិបត្តិការ ការបណ្តុះបណ្តាល និងភស្តុភារផ្សេងៗ ក្នុងគោលបំណងបម្រើផលប្រយោជន៍ជាយុទ្ធសាស្ត្ររបស់កងទ័ពទាំងពីរ។

លោក Huneiti បានលើកឡើងពីភាពជាដៃគូដ៏រឹងមាំ និងយូរអង្វែងរបស់ហ្ស៊កដានី ជាមួយសហរដ្ឋអាមេរិក ដោយសរសើរការគាំទ្រជាប់លាប់ពីទីក្រុងវ៉ាស៊ីនតោន ដែលអាចឲ្យកងកម្លាំងប្រដាប់អាវុធហ្ស៊កដានីអាចបំពេញភារកិច្ចរបស់ពួកគេប្រកបដោយប្រសិទ្ធភាព ចំពេលមានបញ្ហាប្រឈមផ្សេងៗ។

លោក Caine បានសម្តែងការកោតសរសើរចំពោះតួនាទីដ៏សំខាន់របស់កងកម្លាំងប្រដាប់អាវុធហ្ស៊កដានី ក្នុងការលើកកម្ពស់សន្តិសុខ និងស្ថិរភាពនៅទូទាំងតំបន់។ លោកបាននិយាយថា សហរដ្ឋអាមេរិកប្តេជ្ញារក្សាភាពជាដៃគូជិតស្និទ្ធជាមួយទីក្រុង Amman ។

មន្ត្រីជាន់ខ្ពស់នៃកងកម្លាំងប្រដាប់អាវុធហ្ស៊កដានី និងមន្ត្រីការពារជាតិអាមេរិក នៅទីក្រុង Amman ក៏បានចូលរួមកិច្ចប្រជុំនេះដែរ។