នៅថ្ងៃចន្ទ (ទី៣០ ខែមិថុនា) នេះ ប្រទេសបារាំង «បានថ្កោលទោសយ៉ាងខ្លាំង» ដល់ការគំរាមកំហែង ចំពោះប្រមុខទីភ្នាក់ងារថាមពលបរមាណូអន្តរជាតិ (IAEA) ដោយបង្ហាញការគាំទ្រយ៉ាងពេញទំហឹង ចំពោះទីភ្នាក់ងាររបស់អង្គការសហប្រជាជាតិ (UN) និងការដឹកនាំរបស់ស្ថាប័ននេះ។

តាមរយៈសេចក្តីថ្លែងការណ៍ជាលាយលក្ខណ៍អក្សររបស់ខ្លួន ក្រសួងការបរទេសបារាំង បានឲ្យដឹងថា ទីក្រុងប៉ារីស «ថ្កោលទោសយ៉ាងខ្លាំង ចំពោះការគំរាមកំហែងទាំងឡាយណា» ដែលសំដៅទៅលើលោក Rafael Grossi ហើយបានរំលឹកឡើងវិញនូវ «ការគាំទ្រពេញទំហឹងរបស់ខ្លួន ចំពោះទីភ្នាក់ងារ និងអគ្គនាយករបស់ស្ថាប័ននេះ ក្នុងការអនុវត្តអាណត្តិរបស់ខ្លួន ប្រកបដោយភាពឯករាជ្យ និងមិនលម្អៀង»។

ជាមួយគ្នានេះ សេចក្តីថ្លែងការណ៍នោះ បានសម្តែងក្ដីបារម្ភយ៉ាងខ្លាំង ចំពោះអ្វីដែលខ្លួនបានពិពណ៌នាថា ជាបញ្ហាប្រឈមណាមួយ ចំពោះកិច្ចសហប្រតិបត្តិការរបស់អ៊ីរ៉ង់ជាមួយអង្គការឃ្លាំមើលនុយក្លេអ៊ែររបស់ UN។

សេចក្ដីថ្លែងការណ៍បានរៀបរាប់ថា «ប្រទេសបារាំងសូមបង្ហាញក្ដីបារម្ភយ៉ាងខ្លាំង ចំពោះការធ្វើឲ្យប៉ះពាល់ណាមួយដល់កិច្ចសហប្រតិបត្តិការរបស់អ៊ីរ៉ង់ជាមួយ IAEA ហើយអំពាវនាវឲ្យអាជ្ញាធរអ៊ីរ៉ង់បំពេញកាតព្វកិច្ចអន្តរជាតិរបស់ខ្លួនឲ្យបានពេញលេញ ភ្លាមៗ និងដោយគ្មានលក្ខខណ្ឌ នៅក្រោមកិច្ចព្រមព្រៀងការពារគ្រប់ជ្រុងជ្រោយ»។

ហើយក្រសួងការបរទេសក៏បានរំលឹកដល់ទីក្រុងតេអេរ៉ង់ អំពីការការទទួលខុសត្រូវរបស់ខ្លួន ពាក់ព័ន្ធនឹងសុវត្ថិភាព និងសន្តិសុខរបស់បុគ្គលិក IAEA នៅក្នុងប្រទេស។ សេចក្តីថ្លែងការណ៍នោះបានបញ្ជាក់បន្ថែមថា៖ «ប្រទេសបារាំងសូមរំលឹកឡើងវិញនូវការទទួលខុសត្រូវរបស់រដ្ឋាភិបាលអ៊ីរ៉ង់ ដែលត្រូវធានាសុវត្ថិភាព និងសន្តិសុខដល់បុគ្គលិករបស់ទីភ្នាក់ងារនៅក្នុងប្រទេសអ៊ីរ៉ង់»។

គួរបញ្ជាក់ថា ការថ្កោលទោសរបស់បារាំងនេះ បានកើតមានឡើងបន្ទាប់ពីមានការវាយប្រហារតាមផ្លូវអាកាសដ៏ចម្រូងចម្រាសរបស់អាមេរិកលើទីតាំងនុយក្លេអ៊ែរអ៊ីរ៉ង់ បន្ទាប់មកអ៊ីរ៉ង់បានរារាំងលោក Grossi មិនឲ្យចូលប្រទេស និងបន្ទាប់ពីសភារបស់អ៊ីរ៉ង់ បានអនុម័តច្បាប់បញ្ឈប់កិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែររបស់ UN៕