យ៉ាងហោចណាស់មនុស្ស ១២នាក់ បានបាត់បង់ជីវិត និង ៣៦នាក់ បានរងរបួស នៅក្នុងហេតុការណ៍ផ្ទុះរ៉េអាក់ទ័រ នៅរោងចក្រគីមីមួយ ក្នុងទីក្រុង Sangareddy នៃរដ្ឋ Telangana របស់ប្រទេសឥណ្ឌា នៅថ្ងៃចន្ទ (ទី៣០ ខែមិថុនា)។

ឧបទ្ទវហេតុនេះបានកើតឡើងនៅចន្លោះម៉ោងធ្វើការ នៅរោងចក្រ Sigachi Chemicals ក្នុងតំបន់ឧស្សាហកម្ម Pashamylaram។ ហើយយោងតាមប្រភព បានឲ្យដឹងថា មានមនុស្សសរុបចំនួន ៦១នាក់នៅក្នុងអគារ នៅពេលដែលការផ្ទុះបានកើតឡើង ហើយមនុស្សជាច្រើននៅតែជាប់នៅខាងក្នុងនោះ។

ប្រភពពីនគរបាលបានឲ្យដឹងថា៖ «មនុស្សមួយចំនួន ក្នុងចំណោមអ្នកដែលត្រូវបានជួយសង្គ្រោះ បានរងរបួសធ្ងន់ធ្ងរ។ យើងមិនទាន់បានដឹងថា មានមនុស្សប៉ុន្មាននាក់ដែលជាប់នៅក្នុងនោះទេ»។

មន្ត្រីនាយកដ្ឋានពន្លត់អគ្គិភ័យ បានប្រាប់ថា រថយន្តពន្លត់អគ្គិភ័យចំនួន ១១គ្រឿង ត្រូវបានបញ្ជូនទៅកាន់កន្លែងនោះ ដើម្បីធ្វើប្រតិបត្តិការជួយសង្គ្រោះ និងសង្គ្រោះ។ មន្ត្រីរដ្ឋបាលស្រុកម្នាក់បាននិយាយថា៖ «ប្រតិបត្តិការពន្លត់អគ្គិភ័យ កំពុងដំណើរការ ហើយនៅមានមនុស្សជាប់ក្នុងអគារនៅឡើយ»។

រដ្ឋាភិបាលប្រចាំរដ្ឋ បានចេញសេចក្តីថ្លែងការណ៍មួយដោយបង្ហាញពី «ការតក់ស្លុតយ៉ាងខ្លាំង ចំពោះឧបទ្ទវហេតុអគ្គិភ័យដែលបានកើតឡើងដ៏ធំនេះ»។ មូលហេតុដែលនាំឲ្យមានការផ្ទុះនេះ មិនទាន់ដឹងនៅឡើយទេ៕