​អាមេរិក៖ ប្រធានាធិបតី​អាមេរិក​លោក Joe Biden បាន​ជំរុញ​មេដឹកនាំ​រុស្ស៊ី​លោក Vladimir Putin ឱ្យ​បន្ថយ​ភាព​តានតឹង​ជាមួយ​អ៊ុយ​ក្រែ​ន បើ​ពុំនោះនឹងត្រូវ​ប្រឈម​ការខាតបង់​ដ៏​ធ្ងន់ធ្ងរ ក្នុងអំឡុងពេល​សន្ទនា​តាម​ទូរស័ព្ទ​កាលពី​ថ្ងៃ​ព្រហស្បតិ៍ ខណៈដែល​សហរដ្ឋអាមេរិក និងសម្ព័ន្ធមិត្ត​ព្យាយាម​សម្របសម្រួល​ការឆ្លើយតប​របស់​ពួកគេ​ ចំពោះ​ការបង្កើន​កម្លាំងយោធារ​បស់​ទីក្រុង​ម៉ូស្គូ​នៅតាម​ព្រំដែន ​ជាមួយប្រទេសជិតខាង​ភាគ​លិច​របស់ខ្លួន​។​

​អ្នកនាំពាក្យ​សេត​វិមានលោកស្រី Jen Psaki បាន​និយាយ​អំពី​ការសន្ទនា​តាម​ទូរស័ព្ទ ​ដែលមាន​រយៈពេល​ប្រហែល​មួយ​ម៉ោង​ថា លោក Biden "​បានបញ្ជាក់​យ៉ាងច្បាស់​ថា​ សហរដ្ឋអាមេរិក និង​សម្ព័ន្ធមិត្ត និង​ដៃគូ​របស់ខ្លួន​នឹង​ឆ្លើយតប​យ៉ាង​ម៉ឺងម៉ាត់ ប្រសិនបើ​រុស្ស៊ី​ឈ្លានពាន​អ៊ុយ​ក្រែ​ន​បន្ថែមទៀត​។ ​មន្ត្រីជាន់ខ្ពស់​ក្នុង​រដ្ឋបាល​លោក Joe Biden បាន​និយាយ​ដោយ​សំដៅ​ដល់​ការព្រមាន​កាលពី​កន្លងទៅ​របស់​ទីក្រុង​វ៉ាស៊ីនតោន​ថា ការឆ្លើយតប​បែបនេះ​ពី​សហរដ្ឋអាមេរិក​នឹង​រួមបញ្ចូល​ការដាក់ទណ្ឌកម្ម​សេដ្ឋកិច្ច ការកើនឡើង​នៃ​កងកម្លាំង​អង្គការ​ណា​តូនៅក្នុង​ប្រទេស​សម្ព័ន្ធមិត្ត​ក្នុង​តំបន់ និង​ការបង្កើន​ជំនួយ​របស់​សហរដ្ឋអាមេរិក​ដល់​អ៊ុយ​ក្រែ​ន "​ដើម្បី​ផ្ដល់​លទ្ធភាព​ការពារ​ខ្លួន និង​ទឹកដី​របស់​ខ្លួន​បន្ថែមទៀត។

​អ៊ុយ​ក្រែ​ន​បានប្រកាស​ឯករាជ្យ​ពី​អតីត​សហភាពសូវៀត​ក្នុង​ឆ្នាំ១៩៩១ ហើយ​ឥឡូវនេះ​ជា​លទ្ធិប្រជាធិបតេយ្យ​ដែលមាន​និន្នាការ​គាំទ្រ​លោក​ខាងលិច​។ ក្រុម​អ្នកជំនាញ​គោលនយោបាយ​ការបរទេស​របស់​សហ​រដ្ឋ​អាមេរិកនិយាយថា វា​គឺជា​ផលប្រយោជន៍​របស់​អាមេរិក​ក្នុងការ​ទប់ទល់​នឹង​ការឈ្លានពាន​របស់​រុស្ស៊ី ជាពិសេស​នៅពេលដែល​លោក Putin សម្លឹង​រក​ការកសាង​ចក្រភព​សូ​វៀត​ឡើងវិញ​។​ ​មន្ត្រី​ជំនិតរបស់​វិមាន​ក្រឹម​ឡាំង​បាន​និយាយ​កាលពី​ថ្ងៃ​ព្រហស្បតិ៍​ថា លោក​ប្រធានាធិបតី​រុស្ស៊ី Vladimir Putin បាន​ប្រាប់​សម​ភាគី​សហរដ្ឋអាមេរិកលោក Joe Biden ថា​ ការដាក់ទណ្ឌកម្ម​ណាមួយ​ជុំវិញ​បញ្ហា​អ៊ុយ​ក្រែ​ន​នឹង​ក្លាយជា​កំហុស​ដ៏​ធំ​មួយ បន្ទាប់ពី​មេដឹកនាំ​ទាំងពីរ​បាន​ពិភាក្សាគ្នា​តាម​ទូរស័ព្ទ​មុន​កិច្ចពិភាក្សា​ថ្នាក់ក្រោម​នៅ​ខែក្រោយ​៕

អត្ថបទ៖ សុខមាន