យោងតាមការសិក្សាស្រាវជ្រាវមួយដែលចេញផ្សាយក្នុងទិនានុប្បវត្តិវេជ្ជសាស្ត្រ Lancet កាលពីថ្ងៃចន្ទ (៣០ មិថុនា) បានបង្ហាញថា ការកាត់បន្ថយការផ្តល់មូលនិធិយ៉ាងជ្រាលជ្រៅដល់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ឬហៅកាត់ថាអង្គការ USAID និងលទ្ធភាពនៃការរុះរើស្ថាប័ននេះ អាចបណ្តាលឱ្យមានអ្នកស្លាប់បន្ថែមលើសពី ១៤លាននាក់ នៅត្រឹមឆ្នាំ២០៣០។

រដ្ឋបាលរបស់លោកប្រធានាធិបតីអាមេរិក Donald Trump ចាប់តាំងពីចូលកាន់តំណែងក្នុងខែមករាមក បានកាត់បន្ថយការផ្តល់មូលនិធិដល់ USAID និងកម្មវិធីជំនួយរបស់ទីភ្នាក់ងារនេះទូទាំងពិភពលោក នៅក្នុងអ្វីដែលរដ្ឋាភិបាលអាមេរិកនិយាយថា គឺជាផ្នែកនៃផែនការទូលំទូលាយរបស់ខ្លួនក្នុងការដកចេញនូវការចំណាយខ្ជះខ្ជាយ។

ក្រុមអ្នកជំនាញសិទ្ធិមនុស្ស និងអ្នកតស៊ូមតិបានព្រមានប្រឆាំងនឹងការកាត់បន្ថយបែបនេះ។ ការសិក្សាបានឱ្យដឹងថា ការផ្តល់មូលនិធិរបស់ទីភ្នាក់ងារ USAID មានតួនាទីយ៉ាងសំខាន់ក្នុងការធ្វើឱ្យប្រសើរឡើងនូវសុខភាពពិភពលោក ដោយផ្តោតជាចម្បងទៅលើបណ្ដាប្រទេសដែលមានចំណូលទាប និងមធ្យម ជាពិសេសនៅទ្វីបអាហ្វ្រិក។

ការស្រាវជ្រាវនេះប៉ាន់ប្រមាណថា ក្នុងពេលពីរទសវត្សរ៍កន្លងមកនេះ កម្មវិធីដែលផ្តល់មូលនិធិដោយ USAID បានទប់ស្កាត់ការស្លាប់ជាង ៩១លាននាក់ ទូទាំងពិភពលោក រួមទាំងការស្លាប់ចំនួន ៣០លាននាក់ក្នុងចំណោមកុមារ។ ការសិក្សានៅទិនានុប្បវត្តិ The Lancet ព្រមានថា ការព្យាករបានបង្ហាញថា ការកាត់ថវិកាយ៉ាងស៊ីជម្រៅដែលកំពុងបន្ត រួមជាមួយនឹងការរុះរើដែលអាចកើតមាននៃទីភ្នាក់ងារនេះ អាចបណ្តាលឱ្យមានអ្នកស្លាប់បន្ថែមជាង ១៤លាននាក់នៅឆ្នាំ២០៣០ រួមទាំងការស្លាប់ចំនួន ៤,៥លាននាក់ ក្នុងចំណោមកុមារដែលមានអាយុក្រោម ៥ឆ្នាំ៕