ប្រធានាធិបតីសហរដ្ឋអាមេរិក លោក Donald Trump នឹងជួបជាមួយនាយករដ្ឋមន្ត្រីអ៊ីស្រាអែល លោកBenjamin Netanyahu នៅសេតវិមាននៅថ្ងៃទី ៧ ខែកក្កដា ខណៈប្រធានាធិបតីសហរដ្ឋអាមេរិកបានជំរុញឱ្យមានបទឈប់បាញ់រវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា និងការនាំត្រឡប់មកវិញនៃចំណាប់ថ្នូរដែលនៅសល់។

លោកស្រី Karoline Leavitt អ្នកនាំពាក្យរបស់ លោក Trump បាននិយាយទៅកាន់អ្នកសារព័ត៌មាននៅក្នុងសន្និសីទសារព័ត៌មានមួយកាលពីថ្ងៃចន្ទថា លោក Ron Dermer ទីប្រឹក្សាជាន់ខ្ពស់របស់នាយករដ្ឋមន្ត្រីអ៊ីស្រាអែល លោក Benjamin Netanyahu ស្ថិតនៅក្នុងទីក្រុងវ៉ាស៊ីនតោនក្នុងសប្តាហ៍នេះ ដើម្បីជួបជាមួយមន្ត្រីនៅសេតវិមាន ។

មន្ត្រីអ៊ីស្រាអែលនៅក្រុងវ៉ាស៊ីនតោន បានបញ្ជាក់ពីជំនួបនៅថ្ងៃចន្ទសប្តាហ៍ក្រោយថា មេដឹកនាំទាំងពីរត្រូវបានគេរំពឹងថា នឹងពិភាក្សាអំពីបញ្ហាប្រទេសអ៊ីរ៉ង់ តំបន់ហ្កាហ្សា ប្រទេសស៊ីរី និងបញ្ហាប្រឈមនានានៅក្នុងតំបន់។

អ៊ីស្រាអែល បានបង្កើនការវាយលុករបស់ខ្លួនលើតំបន់ហ្កាហ្សាភាគខាងជើងកាលពីថ្ងៃចន្ទ មួយថ្ងៃបន្ទាប់ពីលោក Trump បានជំរុញឱ្យបញ្ចប់សង្គ្រាមដែលមានរយៈពេល២០ខែ ដោយបានបង្ហោះនៅលើបណ្តាញផ្សព្វផ្សាយសង្គមថា «បង្កើតកិច្ចព្រមព្រៀងនៅតំបន់ហ្កាហ្សា ហើយនាំយកចំណាប់ថ្នូរត្រឡប់មកវិញ»។ លោកស្រី Leavitt បានប្រាប់អ្នកសារព័ត៌មានថា រដ្ឋបាលលោក Trump កំពុងទាក់ទងឥតឈប់ឈរជាមួយរដ្ឋាភិបាលអ៊ីស្រាអែល ដោយនិយាយថា លោក Trump បានចាត់ទុកការបញ្ចប់សង្រ្គាមនៅតំបន់ហ្កាហ្សា និងការនាំយកចំណាប់ថ្នូរនៅសល់ដែលត្រូវបានចាប់ឃុំខ្លួនដោយក្រុមសកម្មប្រយុទ្ធហាម៉ាសប៉ាឡេស្ទីនត្រឡប់មកវិញ គឺជាអាទិភាពកំពូល។