រលកកម្ដៅដ៏គ្រោះថ្នាក់បន្តគ្របដណ្តប់ភាគច្រើននៃទ្វីបអឺរ៉ុប កាលពីថ្ងៃចន្ទ (៣០ មិថុនា) ជាមួយនឹងថ្ងៃដ៏ក្តៅគគុកនៅតាមទីតាំងនានាទូទាំងទ្វីប។ ការព្រមានពីកម្ដៅត្រូវដាក់ចេញសម្រាប់ផ្នែកខ្លះនៃប្រទេសអេស្ប៉ាញ ព័រទុយហ្គាល់ អ៊ីតាលី អាល្លឺម៉ង់ និងចក្រភពអង់គ្លេស ជាមួយនឹងកម្រិតខ្ពស់ថ្មីនៃសីតុណ្ហភាពដ៏ក្ដៅគគុកត្រូវបានរំពឹងទុកនៅថ្ងៃពុធពាក់កណ្ដាលសប្ដាហ៍នេះ មុនពេលភ្លៀងធ្លាក់តិចតួចអាចនាំមកនូវភាពធូរស្បើយខ្លះដល់តំបន់មួយចំនួន។

លោក Hans Kluge ប្រធានការិយាល័យអឺរ៉ុបរបស់អង្គការសុខភាពពិភពលោក បានព្រមាននៅក្នុងសេចក្តីថ្លែងការណ៍មួយថា កម្ដៅដ៏គ្រោះថ្នាក់ "បានគំរាមកំហែងយ៉ាងស្ងៀមស្ងាត់ដល់មនុស្សដែលត្រូវការការការពារបំផុត ពោលគឺមនុស្សវ័យចំណាស់ កុមារ កម្មករធ្វើការនៅទីវាល និងអ្នកមានស្ថានភាពសុខភាពរ៉ាំរ៉ៃ"។

អាជ្ញាធរព័រទុយហ្គាល់បានចេញការព្រមានពីកម្ដៅពណ៌ក្រហមសម្រាប់ស្រុកចំនួន៧ ក្នុងចំណោម ១៨ស្រុក ខណៈសីតុណ្ហភាពត្រូវព្យាករថានឹងឡើងដល់ ៤៣អង្សារសេ។ សេវាអាកាសធាតុជាតិអេស្ប៉ាញនិយាយថា មិនមានការធូរស្រាលពីរលកកម្ដៅដំបូងនៃឆ្នាំនេះទេ ដែលរំពឹងទុករហូតដល់ថ្ងៃព្រហស្បតិ៍សប្ដាហ៍នេះ ខណៈផ្នែកជាច្រើននៃប្រទេសបានជួបប្រទះសីតុណ្ហភាពកើនឡើងដល់ ៤៦អង្សាសេ។

នៅបារាំង ជាទីដែលម៉ាស៊ីនត្រជាក់នៅតែកម្រ អាជ្ញាធរកំពុងប្រឹងប្រែងបន្ថែម ដើម្បីថែទាំជនគ្មានផ្ទះសម្បែង និងមនុស្សចាស់។ នៅអ៊ីតាលី ក្រសួងសុខាភិបាលបានដាក់ទីក្រុងចំនួន២១ ឱ្យស្ថិតក្រោមការប្រកាសអាសន្ន "ពណ៌ក្រហម" ដែលបង្ហាញពី "លក្ខខណ្ឌសង្គ្រោះបន្ទាន់ ជាមួយនឹងផលប៉ះពាល់អវិជ្ជមានដែលអាចកើតមាន" នៃកម្ដៅ។ ជាមួយគ្នានេះ នៅប្រទេសផ្សេងទៀតរួមទាំងចក្រភពអង់គ្លេស អាល្លឺម៉ង់ ក៏ដូចជាទួរគី កំពុងរិះរកវិធីទប់ទល់រលកកម្ដៅដ៏គ្រោះថ្នាក់នេះ៕