អ៊ីរ៉ង់ បានប្រកាន់ជំហរមិនកែប្រែប្រឆាំងនឹងទីភ្នាក់ងារថាមពលបរមាណូអន្តរជាតិ (IAEA) ដោយរដ្ឋមន្ត្រីការបរទេសរបស់ប្រទេសនេះ លោក Abbas Araghchi បានច្រានចោលសំណើរបស់ប្រធានទីភ្នាក់ងារនេះលោក Rafael Grossi ដើម្បីទៅទស្សនាទីតាំងនុយក្លេអ៊ែរដែលត្រូវបានទម្លាក់គ្រាប់បែកដោយអ៊ីស្រាអែល និងសហរដ្ឋអាមេរិក ក្នុងអំឡុងពេលជម្លោះរយៈពេល ១២ ថ្ងៃកាលពីដើមខែនេះ។

លោក Araghchi បាននិយាយលើបណ្ដាញសង្គម X កាលពីថ្ងៃចន្ទដើមសប្ដាហ៍នេះថា ការទទូចរបស់លោក Grossi លើការទៅត្រួតពិនិត្យទីតាំងដែលត្រូវបានទម្លាក់គ្រាប់បែកក្រោមលេសនៃការការពារគឺគ្មានន័យទេ ហើយប្រហែលជាមានចេតនាអាក្រក់ផងដែរ។

អ៊ីរ៉ង់រក្សាសិទ្ធិក្នុងការចាត់វិធានការណាមួយដើម្បីការពារផលប្រយោជន៍ ប្រជាជន និងអធិបតេយ្យភាពរបស់ខ្លួន។ 

ទន្ទឹមនឹងនោះ ប្រធានាធិបតីអ៊ីរ៉ង់លោក Masoud Pezeshkian បានប្រាប់សមភាគីបារាំងលោក Emmanuel Macron ថាទីក្រុងតេអេរ៉ង់បានបញ្ឈប់កិច្ចសហប្រតិបត្តិការជាមួយ IAEA ដោយសារតែអ្វីដែលលោកបានហៅថាអាកប្បកិរិយាមិនល្អ របស់លោក Grossi ចំពោះប្រទេសអ៊ីរ៉ង់។

លោក Pezeshkian បានប្រាប់លោក Macron ក្នុងជំនួបតាមទូរស័ព្ទថា ចំណាត់ការដែលធ្វើឡើងដោយក្រុមសមាជិកសភា គឺជាការឆ្លើយតបចំពោះទង្វើមិនសមហេតុផល ពុំមានការស្ថាបនា និងការបំផ្លិចបំផ្លាញរបស់ប្រមុខទីភ្នាក់ងារថាមពលអាតូមិកអន្តរជាតិរូបនេះ៕