ក្រុមមន្ត្រីបាននិយាយថា ជិតមួយសប្តាហ៍នៃភ្លៀងមូសុងដ៏ខ្លាំងក្លា និងទឹកជំនន់យ៉ាងគំហុកនៅទូទាំងប្រទេសប៉ាគីស្ថាន បានសម្លាប់មនុស្សយ៉ាងហោចណាស់ ៤៦នាក់ និងមនុស្សរាប់សិបនាក់រងរបួស។ រដ្ឋាភិបាលប៉ាគីស្ថាន បានប្រកាសចំនួនអ្នកស្លាប់ដ៏ច្រើននេះកាលថ្ងៃចន្ទ (៣០ មិថុនា) ហើយនិយាយថា ការស្លាប់ទាំងនោះគឺបណ្តាលមកពីភ្លៀងធ្លាក់ខ្លាំងមិនធម្មតាជាច្រើនថ្ងៃ។

អាជ្ញាធរជាតិគ្រប់គ្រងគ្រោះមហន្តរាយ និងមន្ត្រីសង្គ្រោះបន្ទាន់បាននិយាយថា ជនរងគ្រោះរួមមានមនុស្ស ២២នាក់ ស្លាប់នៅក្នុងខេត្ត Khyber Pakhtunkhwa ភាគពាយព្យប៉ាគីស្ថាន និងការស្លាប់ ១៣នាក់ នៅខេត្តភាគខាងកើតនៃរដ្ឋ Punjab ហើយមនុស្ស ៧នាក់ ស្លាប់នៅតំបន់ Sindh នៅភាគខាងត្បូង និង ៤នាក់ នៅ Balochistan នៅភាគនិរតី។

លោក Irfan Virk អនុប្រធាននាយកដ្ឋានឧតុនិយមប៉ាគីស្ថាន បានប្រាប់ទីភ្នាក់ងារសារព័ត៌មាន AP ថា អ្នកព្យាករមិនអាចបដិសេធការកើតឡើងម្តងទៀតនៃព្រឹត្តិការណ៍អាកាសធាតុធ្ងន់ធ្ងរ ដូចជាទឹកជំនន់ដ៏បំផ្លិចបំផ្លាញក្នុងឆ្នាំ២០២២ នោះទេ។ គួររម្លឹកថា ភ្លៀងធ្លាក់ខ្លាំងកាលឆ្នាំនោះ បានជន់លិចមួយភាគបីនៃប្រទេស ដោយម្លាប់មនុស្សជិត ២ពាន់នាក់ និងបណ្តាលឱ្យមានការបំផ្លិចបំផ្លាញយ៉ាងទូលំទូលាយ។

កាលពីថ្ងៃអាទិត្យចុងសប្ដាហ៍ អាជ្ញាធរជាតិគ្រប់គ្រងគ្រោះមហន្តរាយប៉ាគីស្ថាន បានព្រមានពីគ្រោះថ្នាក់ដែលអាចកើតមានបន្ថែមទៀត និងបានណែនាំប្រជាជនកុំឱ្យឆ្លងទន្លេ និងអូរដែលមានទឹកហូរយ៉ាងគ្រោះថ្នាក់៕