តុលាការព្រហ្មទណ្ឌនៅទីក្រុងបាងកក ប្រទេសថៃ បានចាប់ផ្តើមបើកសវនាការជាលើកដំបូងនៅក្នុងសំណុំរឿងប្រមាថព្រះមហាក្សត្រប្រឆាំងនឹងអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) នៅថ្ងៃអង្គារ (០១ កក្កដា) នេះ។

មេធាវីរបស់លោក ថាក់ស៊ីន គឺលោក Winyat Chartmontri និងប្អូនថ្លៃរបស់លោកដែលក៏ជាអតីតនាយករដ្ឋមន្ត្រីថៃផងដែរ គឺលោក Somchai Wongsawat ត្រូវបានមើលឃើញថាទៅដល់តុលាការ។ លោក ថាក់ស៊ីន មិនត្រូវបានគេមើលឃើញថាដើរចូលទៅក្នុងតុលាការនោះទេ ប៉ុន្តែក្រោយមក រថយន្តរបស់លោកត្រូវបានប្រទះឃើញនៅក្នុងចំណត។

បណ្ដឹងប្រឆាំងនឹងលោក ថាក់ស៊ីន មួយនេះបានផ្តើមចេញពីបទសម្ភាសន៍តាមប្រព័ន្ធផ្សព្វផ្សាយកាលពីឆ្នាំ២០១៥ ដែលលោកបានធ្វើពេលកំពុងនិរទេសខ្លួនដោយបង្ខំ ហើយលោកបានត្រលប់ទៅប្រទេសថៃវិញនៅឆ្នាំ២០២៣ ដើម្បីទទួលទោសជាប់ពន្ធនាគារពីបទទំនាស់ផលប្រយោជន៍ និងការរំលោភបំពានអំណាច។

ការកាត់ក្តីពីបទប្រមាថព្រះមហាក្សត្រមួយនេះក៏បានកើតឡើងនៅពេលដែលលោក ថាក់ស៊ីន វ័យ ៧៥ឆ្នាំ កំពុងប្រឈមមុខនឹងសេចក្ដីសម្រេចមួយរបស់តុលាការកំពូលនៅក្នុងខែនេះ ដែលអាចលុបចោលការលើកលែងទោសរបស់លោកកាលពីខែកុម្ភៈឆ្នាំមុន បន្ទាប់ពីការសម្រាកព្យាបាលជំងឺនៅមន្ទីរពេទ្យអស់រយៈពេល ៦ខែ៕