អាជ្ញាធរម៉ិកស៊ិក បានរកឃើញសាកសពមនុស្សចំនួន ២០នាក់ នៅក្នុងរដ្ឋ Sinaloa ដ៏ហិង្សាដែលគ្រប់ដណ្ដប់ដោយភ្លើងសង្រ្គាមរវាងបក្សពួកនៃក្រុមជួញដូរគ្រឿងញៀន Sinaloa ខណៈតំបន់ម៉ិកស៊ិកមួយនេះកំពុងឈានដល់កម្រិតខ្ពស់ថ្មីនៃអំពើហិង្សាដ៏បង្ហូរឈាម។

ការិយាល័យរដ្ឋអាជ្ញារបស់រដ្ឋ បាននិយាយកាលពីថ្ងៃចន្ទ (៣០ មិថុនា) ថា សពជនរងគ្រោះ ៤នាក់ត្រូវបានកាត់ក្បាល ហើយរាងកាយបស់ពួកគេត្រូវបានព្យួរលើស្ពាននៅផ្លូវធំមួយនៅជិតក្រុង Culiacán របស់រដ្ឋមួយនេះ ខណៈសាកសព ១៦នាក់ផ្សេងទៀត ដែលម្នាក់ត្រូវក៏បានកាត់ក្បាលផងដែរ ត្រូវបានរកឃើញនៅក្នុងរថយន្តចតចោលនៅក្រោមស្ពាននោះ។ ក្បាលរបស់សាកសព ត្រូវបានរកឃើញក្នុងកាបូបមួយនៅកន្លែងកើតហេតុ។

សោកនាដកម្មដ៏រន្ធត់ និងក្រៀមក្រំនេះ បានកើតឡើងនៅចុងបញ្ចប់នៃខែដ៏ឃោរឃៅបំផុតរហូតមកដល់ពេលនេះ ក្នុងសង្គ្រាមរវាងក្រុមជួញដូរគ្រឿងញៀន Sinaloa ដែលជាអង្គការជួញដូរគ្រឿងញៀនដ៏មានឥទ្ធិពលបំផុតមួយរបស់ប្រទេសម៉ិកស៊ិក ប្រឆាំងនឹងគូប្រជែងសំខាន់របស់ខ្លួនគឺក្រុមឧក្រិដ្ឋជនគ្រឿងញៀន Jalisco New Generation។

ជម្លោះដ៏ហិង្សានេះបានផ្ទុះឡើងនៅថ្ងៃទី០៩ ខែកញ្ញា ឆ្នាំ២០២៤ រយៈពេល ៦សប្តាហ៍បន្ទាប់ពីការចាប់ខ្លួនមេឧក្រិដ្ឋកម្មដ៏មានឥទ្ធិពលបំផុតរបស់ម៉ិកស៊ិកពីរនាក់នៅក្រុង El Paso រដ្ឋតិចសាស់ របស់អាមេរិក។ រដ្ឋាភិបាលម៉ិកស៊ិក បានដាក់ពង្រាយទាហានរាប់ពាន់នាក់ចូលទៅក្នុងរដ្ឋ Sinaloa ប៉ុន្តែបានបង្ហាញថាមិនអាចទប់ស្កាត់អំពើហិង្សាដ៏ឃោរឃៅនោះបានឡើយ៕