យោងតាមធនាគារពិភពលោក (World Bank) បានឱ្យដឹងថា ភាពក្រីក្រខ្លាំងកំពុងកើនឡើងនៅក្នុងប្រទេសចំនួន៣៩ ទូទាំងសកលលោក ដែលរងផលប៉ះពាល់ដោយសង្គ្រាម និងជម្លោះ ដែលបណ្តាលឱ្យមនុស្សជាងមួយពាន់លាននាក់ត្រូវអត់ឃ្លានធ្ងន់ធ្ងរ។

ស្ថាប័នពិភពលោក ដែលមានមូលដ្ឋាននៅទីក្រុងវ៉ាស៊ីនតោនមួយនេះបាននិយាយថា សង្គ្រាមស៊ីវិល និងការប្រឈមមុខដាក់គ្នារវាងបណ្ដាប្រទេស ដែលភាគច្រើននៅក្នុងទ្វីបអាហ្រ្វិក បានពន្យឺតកំណើនសេដ្ឋកិច្ចឱ្យដើរថយក្រោយ និងកាត់បន្ថយប្រាក់ចំណូលរបស់ប្រជាជនជាង ១ពាន់លាននាក់ ដោយ "ជំរុញឱ្យមានភាពក្រីក្រកាន់តែខ្លាំងជាងកន្លែងផ្សេងទៀត" ទូទាំងពិភពលោក។

ដោយគូសបញ្ជាក់អំពីវិសាលភាពនៃជម្លោះលើសពីសង្គ្រាមរុស្ស៊ី-អ៊ុយក្រែន និងអ៊ីស្រាអែល-ហ្កាហ្សា ធនាគារពិភពលោកបាននិយាយថា ប្រទេសកំពុងអភិវឌ្ឍចំនួន៣៩ ដែលត្រូវបានចាត់ថ្នាក់ថាស្ថិតក្នុងស្ថានភាពផុយស្រួយ និងរងផលប៉ះពាល់ខ្លាំងដោយជម្លោះ កំពុងត្រូវញាំញីដោយអស្ថិរភាព និងស្ថាប័នដ៏ទន់ខ្សោយ ដែល "រារាំងសមត្ថភាពរបស់ពួកគេក្នុងការសម្រេចបាននូវកំណើនសេដ្ឋកិច្ចដ៏រឹងមាំ និងប្រកបដោយនិរន្តរភាពដែលត្រូវការសម្រាប់ការអភិវឌ្ឍ"។

នៅក្នុងការវាយតម្លៃដំបូងរបស់ខ្លួននៃតំបន់ជម្លោះចាប់តាំងពីជំងឺរាតត្បាតកូវីដ១៩ នៅឆ្នាំ២០២០មក ធនាគារពិភពលោកបានជំរុញឱ្យរដ្ឋាភិបាលលោកខាងលិច បង្កើនការគាំទ្រសម្រាប់បណ្ដាប្រទេសដែលហែកហួរដោយសង្រ្គាម ដើម្បីបញ្ចប់ជម្លោះ និងកសាងស្ថាប័នសំខាន់ៗរបស់ពួកគេឡើងវិញ។

ធនាគារពិភពលោក ដែលផ្តល់ប្រាក់កម្ចីដល់ប្រទេសក្រីក្រ ដើម្បីលើកកម្ពស់កំណើនសេដ្ឋកិច្ចប្រកបដោយស្ថិរភាព បានព្រមានថា ភាពអត់ឃ្លានយ៉ាងធ្ងន់ធ្ងរកំពុងកើនឡើង ហើយគោលដៅអភិវឌ្ឍដែលកំណត់ដោយអង្គការសហប្រជាជាតិឥឡូវនេះ «ឃ្លាតកាន់តែឆ្ងាយ»៕