នៅថ្ងៃអង្គារ (ទី១ ខែកក្កដា) នេះ ប្រភពមួយបានប្រាប់ឲ្យដឹងថា ការិយាល័យនៃលេខាធិការដ្ឋានខុទ្ទកាល័យ បានរៀបចំផែនការបន្ទាន់មួយ ក្នុងករណីដែលតុលាការធម្មនុញ្ញទទួលយកញត្តិដែលដាក់ដោយព្រឹទ្ធសភា និងបញ្ជាឲ្យព្យួរតួនាទីរបស់នាយករដ្ឋមន្ត្រី លោកស្រី Paetongtarn Shinawatra (ផែថងថាន ស៊ីណាវ៉ាត់)។

ក្រុមសមាជិកព្រឹទ្ធសភាបានស្នើសុំឲ្យតុលាការបញ្ចប់តំណែងលោកស្រី Paetongtarn ជានាយករដ្ឋមន្ត្រី ក្រោមការចោទប្រកាន់ពីបទបះបោរដែលប៉ះពាល់ដល់អធិបតេយ្យភាពរបស់ប្រទេស ខណៈដែលលោកស្រីត្រូវបានគេឮបាននិយាយវាយប្រហារមេបញ្ជាភូមិភាគទី២ ថា ជា «គូប្រជែង»។

ប្រភពនោះបានឲ្យដឹងថា ឧបនាយករដ្ឋមន្ត្រី និងជារដ្ឋមន្ត្រីក្រសួងសាធារណការ គឺលោក Suriya Jungrungreangkit (សុរិយា ជុងរ៉ុងរឿងកីត) ត្រូវបានតែងតាំងឲ្យកាន់តួនាទីជានាយករដ្ឋមន្ត្រីស្តីទីជំនួសលោកស្រី Paetongtarn។ លោកនឹងមានសិទ្ធិអំណាចពេញលេញ ហើយនឹងត្រូវយកបញ្ហានេះទៅប្រជុំគណៈរដ្ឋមន្ត្រី ដើម្បីតែងតាំងឧបនាយករដ្ឋមន្ត្រីថ្មី ដែលនឹងទទួលខុសត្រូវលើបញ្ហាបុគ្គលិក និងថវិកា។

ប្រភពដដែលបានបន្ថែមថា អគ្គលេខាធិការនៃគណៈរដ្ឋមន្ត្រី បានសម្តែងក្ដីបារម្ភ ចំពោះស្ថានភាពដែលមិនធ្លាប់មានពីមុនមកនេះជាពិសេស ព្រោះវានឹងក្លាយជាលើកទី១ ក្នុងប្រវត្តិសាស្ត្ររបស់ប្រទេសថៃ ដែលនាយករដ្ឋមន្ត្រីមួយរូប ត្រូវបានព្យួរតំណែង ខណៈដែលគណៈរដ្ឋមន្ត្រីថ្មីស្បថចូលកាន់តំណែង។

ប្រការនេះតម្រូវឲ្យនាយករដ្ឋមន្ត្រីស្តីទីដឹកនាំគណៈរដ្ឋមន្ត្រីថ្មីធ្វើសច្ចាប្រណិធាននៅថ្ងៃទី៣ ខែកក្កដា ឆ្នាំ២០២៥ ដើម្បីបំពេញភារកិច្ចជំនួសនាយករដ្ឋមន្ត្រីដែលត្រូវបានព្យួរតួនាទី៕