ប្រមុខការទូតសហភាពអឺរ៉ុប លោកស្រី Kaja Kallas បានជំរុញឲ្យប្រទេសអាមេនី ការពារតម្លៃប្រជាធិបតេយ្យរបស់ខ្លួន ស្របពេលមាន«ការគំរាមកំហែងកូនកាត់»ពីរុស្ស៊ី ក្នុងដំណើរទស្សនកិច្ចទៅកាន់ទីក្រុងយ៉េរ៉េវ៉ាន់ (Yerevan) កាលពីថ្ងៃចន្ទ។

ទំនាក់ទំនងរវាងអាមេនី និងសម្ព័ន្ធមិត្តប្រពៃណីរុស្ស៊ី មានភាពតានតឹង ចាប់តាំងពីការវាយលុកឆ្នាំ ២០២៣ របស់អាស៊ែរបៃហ្សង់ទៅលើតំបន់ណាហ្គ័រណូ-ការ៉ាបាក់ (Nagorno-Karabakh) ដែលទីក្រុងមូស្គូ មិនបានធ្វើអន្តរាគមន៍ទេ។

ប្រទេសរុស្ស៊ី បានធ្វើជាអ្នកសម្រុះសម្រួលដ៏សំខាន់រវាងអាមេនី និងអាស៊ែរបៃហ្សង់អស់ជាច្រើនឆ្នាំមកហើយ។ ប៉ុន្តែទីក្រុងប្រ៊ុចសែល បានដើរតួនាទីកាន់តែខ្លាំងនាពេលថ្មីៗនេះ ដោយប្រទេសរុស្ស៊ីត្រូវបាន ភ្ជាប់ទៅនឹងការឈ្លានពានលើប្រទេសអ៊ុយក្រែន។

លោកស្រី Kallas បានទៅទស្សនកិច្ចជាច្រើនថ្ងៃ បន្ទាប់ពីអាមេនី បានចាប់ខ្លួនបព្វជិតដ៏មានឥទ្ធិពលម្នាក់ដែលត្រូវបានចោទប្រកាន់ពីបទធ្វើរដ្ឋប្រហារប្រឆាំងនឹងលោកនាយករដ្ឋមន្ត្រី Nikol Pashinyan។

លោកស្រី បាននិយាយថា ខ្លួនបានពិភាក្សាអំពី«ការឈ្លានពានរបស់រុស្ស៊ីប្រឆាំងនឹងអ៊ុយក្រែន និងជាពិសេសសកម្មភាពកូនកាត់រុស្ស៊ី នៅក្នុងគ្រប់ប្រទេសទាំងអស់» ជាមួយរដ្ឋមន្ត្រីការបរទេសអាមេនី លោក Ararat Mirzoyan។

លោកស្រី Kallas បានលើកឡើងថា៖«ការប្តេជ្ញាចិត្តរបស់ប្រទេសអាមេនីចំពោះលទ្ធិប្រជាធិបតេយ្យ និងសេរីភាព គឺពិតជាសំខាន់ណាស់។ តម្លៃទាំងនេះ ត្រូវតែត្រូវបានការពារ ជាពិសេស នៅពេលប្រឈមនឹងការគំរាមកំហែងចម្រុះ ការផ្សព្វផ្សាយព័ត៌មានមិនពិត និងការជ្រៀតជ្រែកពីបរទេស»។

លោក Mirzoyan បានព្រមានទីក្រុងមូស្គូប្រឆាំងនឹងការជ្រៀតជ្រែកក្នុងកិច្ចការនយោបាយផ្ទៃក្នុងរបស់ខ្លួន បន្ទាប់ពីការចាប់ខ្លួនបព្វជិតដ៏មានឥទ្ធិពលលោក Bagrat Galstanyan។