តំណាងអចិន្ត្រៃយ៍របស់អ៊ីស្រាអែលប្រចាំអង្គការសហប្រជាជាតិលោក Danny Danon បាននិយាយថា ក្នុងដំណាក់កាលដ៏សកម្មនៃជម្លោះជាមួយអ៊ីរ៉ង់ យោធាអ៊ីស្រាអែល បានបាញ់ទម្លាក់យានដ្រូនជាង ១.000គ្រឿង និងស្ទាក់ចាប់បានប្រហែល ៩០% នៃមីស៊ីលដែលបានបាញ់។

លោកបានថ្លែងប្រាប់កិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិនៅមជ្ឈិមបូព៌ាថា ៖«យើងបានបំផ្លាញយានដ្រូន ជាង ១.000 គ្រឿង និងស្ទាក់ចាប់បានប្រហែល ៩០% នៃមីស៊ីលដែលត្រូវបានបាញ់មកលើទីក្រុងរបស់យើង»។

«ពុំមានយន្តហោះអ៊ីស្រាអែលមួយគ្រឿងណា បានបាត់បង់ទេ»។

នៅព្រឹកព្រលឹមថ្ងៃទី១៣ មិថុនា អ៊ីស្រាអែល បានបើកប្រតិបត្តិការយោធាប្រឆាំងនឹងអ៊ីរ៉ង់។ រយៈពេលតិចជាង ២៤ម៉ោងក្រោយមក អ៊ីរ៉ង់បានវាយប្រហារសងសឹក។ រយៈពេល ៩ថ្ងៃក្រោយមក គឺនៅព្រឹកថ្ងៃទី ២២ ខែមិថុនា យន្តហោះចម្បាំងអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបី ដោយចូលរួមក្នុងជម្លោះនេះ។ នៅល្ងាចថ្ងៃទី២៣ ខែមិថុនា ទីក្រុងតេអេរ៉ង់បានបើកការវាយប្រហារដោយមីស៊ីលទៅលើមូលដ្ឋាន Al Udeid ដែលជាមូលដ្ឋានទ័ពអាកាសដ៏ធំបំផុតរបស់សហរដ្ឋអាមេរិកនៅក្នុងតំបន់ ដែលមានទីតាំងនៅក្នុងប្រទេសកាតា។ បើតាមអាជ្ញាធរអាមេរិក មិនមានអ្នកស្លាប់ ឬខូចខាតអ្វីគួរឲ្យកត់សម្គាល់ទេ។

នៅពីថ្ងៃទី២៤ ខែមិថុនា ប្រធានាធិបតីអាមេរិក លោក ដូណាល់ ត្រាំ បានប្រកាសថា អ៊ីស្រាអែល និងអ៊ីរ៉ង់បានព្រមព្រៀងលើកបទឈប់បាញ់ទាំងស្រុង។ អាជ្ញាធរអ៊ីស្រាអែលបានបញ្ជាក់ថា ពួកគេបានទទួលយកសំណើរបស់អាមេរិក ហើយបានប្រកាសថា ពួកគេបានបញ្ចប់នូវគោលបំណងទាំងអស់ក្នុងប្រតិបត្តិការប្រឆាំងនឹងអ៊ីរ៉ង់។ ផ្ទុយទៅវិញ ទីក្រុងតេអេរ៉ង់ បាននិយាយថា ខ្លួនបានទទួលជ័យជម្នះលើទីក្រុងតែលអា   វីវ ( Tel Aviv) ដោយបង្ខំឲ្យទីក្រុងនេះ បញ្ឈប់ការឈ្លានពានរបស់ខ្លួន ជាឯកតោភាគី។