បន្ទាប់ពីមានសង្គ្រាមអស់រយៈពេលជាង ៣ឆ្នាំ ការស្ទង់មតិថ្មីមួយ បង្ហាញពីការផ្លាស់ប្តូរដ៏គួរឲ្យកត់សម្គាល់ នៅក្នុងមតិសាធារណៈរបស់អ៊ុយក្រែន ដែលភាគច្រើន (៥៦ភាគរយ) ឥឡូវនេះ មានឆន្ទៈក្នុងការទទួលយក «ការសម្របសម្រួល» ដែលពាក់ព័ន្ធនឹងការព្រមសម្បទានដែនដី ដើម្បីបញ្ចប់ជម្លោះជាមួយរុស្ស៊ី។

ការស្ទង់មតិដែលធ្វើឡើងដោយស្ថាប័នស្ទង់មតិមានមូលដ្ឋាននៅទីក្រុងគីវ បង្ហាញថា ពេលនេះ មានតែ ១២,៨ភាគរយនៃប្រជាជនអ៊ុយក្រែនប៉ុណ្ណោះ ដែលជឿជាក់លើការប្រយុទ្ធ រហូតដល់ទឹកដីទាំងអស់ ត្រូវបានដណ្ដើមកាន់កាប់វិញ។

ការស្រេកឃ្លានចង់បានសន្តិភាពកាន់តែខ្លាំងឡើងនេះ កើតមាននៅពេលដែលរុស្ស៊ីបន្តបង្កើនការវាយប្រហាររបស់ខ្លួន ជាការចាប់ផ្តើមនូវអ្វីដែលអ៊ុយក្រែនហៅថា «ការវាយប្រហារតាមអាកាសដ៏ធំបំផុតនៃសង្រ្គាមនេះ» កាលពីចុងសប្តាហ៍កន្លងមក ដោយបានប្រើប្រាស់យានដ្រូនរាប់រយគ្រឿង និងមីស៊ីលរាប់រយគ្រាប់ ហើយក្តីសង្ឃឹមថា មានអន្តរាគមន៍យ៉ាងម៉ឺងម៉ាត់ពីរដ្ឋបាលរបស់លោក Donald Trump បានរសាត់បាត់ទៅ។

សង្គ្រាមរុស្ស៊ី-អ៊ុយក្រែនដែលមានអាយុកាល ៣ឆ្នាំហើយ នៅតែបន្តឥតស្រាកស្រាន្ត។ ការចរចាសន្តិភាពថ្មីៗបំផុត គឺកាលពីជិតមួយខែមុន ហើយសង្គ្រាមបានកើនឡើងក្នុងប៉ុន្មានសប្តាហ៍នេះ ចាប់តាំងពីនោះមក។ តែយ៉ាងណាក្ដី ការស្ទង់មតិថ្មីមួយបង្ហាញថា ប្រជាជនភាគច្រើននៅអ៊ុយក្រែន បើទោះជាស្ថិតក្នុងកម្រិតតិចតួច នឹងយល់ព្រមឲ្យមាន «ការសម្របសម្រួល» ដើម្បីបញ្ចប់ជម្លោះនេះ។

មជ្ឈមណ្ឌល សម្រាប់ការស្រាវជ្រាវសង្គម និងទីផ្សារ ទាំងស្ថាប័នស្ទង់មតិមានមូលដ្ឋាននៅទីក្រុងគីវ បានរកឃើញថា ៥៦ភាគរយនៃប្រជាជនអ៊ុយក្រែន នឹងយល់ព្រមឲ្យមាន «ការសម្របសម្រួល» ដែលនឹងតម្រូវឲ្យមានការលះបង់ដែនដី ជាថ្នូរនឹងការបញ្ចប់ជម្លោះនេះ។

ជាមួយគ្នានេះ របាយការណ៍នេះបានឲ្យដឹងទៀតថា៖ «១៦,៦ភាគរយទៀតនៃអ្នកដែលត្រូវបានស្ទង់មតិ នឹងយល់ព្រមលើការបញ្ឈប់ឲ្យទ្រឹងតាមបណ្ដោយសមរភូមិជួរមុខបច្ចុប្បន្ន ហើយមានតែ ១២,៨ប៉ុណ្ណោះដែលចង់ឲ្យទីក្រុងគីវ ប្រយុទ្ធរហូតដល់ដណ្ដើមបានមកវិញនូវទឹកដីទាំងអស់ដែលរុស្ស៊ីបានកាន់កាប់តាំងពីឆ្នាំ២០១៤»៕