ប្រធានាធិបតីបារាំង លោក Emmanuel Macron កាលពីថ្ងៃចន្ទ (ទី៣០ ខែមិថុនា) បានលើកឡើងថា វិធានការដំឡើងពន្ធ ដែលដាក់ដោយប្រទេសមានអំណាច គឺតែងតែជាទម្រង់នៃ «ការសម្លុតទារប្រយោជន៍» ជាជាងឧបករណ៍ ដើម្បីធ្វើឲ្យមានតុល្យភាពពាណិជ្ជកម្មឡើងវិញ។

អំឡុងសុន្ទរកថា នៅឯសន្និសីទអន្តរជាតិ ស្តីពីការផ្តល់ហិរញ្ញប្បទាន សម្រាប់ការអភិវឌ្ឍ នៅទីក្រុង Seville ប្រទេសអេស្ប៉ាញ ទោះបីជាលោកមិនបានសំដៅជាពិសេសទៅលើសហរដ្ឋអាមេរិក ឬប្រធានាធិបតីអាមេរិក លោក Donald Trump ក៏ដោយ ក៏ការអត្ថាធិប្បាយរបស់លោកបែបនេះ បានកើតមានឡើងស្របពេលដែលសហភាពអឺរ៉ុប (EU) កំពុងបន្តការចរចាកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក នៅមុនកាលកំណត់ថ្ងៃទី៩ ខែកក្កដា។

លោក Macron បាននិយាយថា៖ «យើងត្រូវតែស្ដារសេរីភាព និងសមធម៌ សម្រាប់ពាណិជ្ជកម្មអន្តរជាតិ ជាជាងបង្កើតរបាំង និងដំឡើងពន្ធគយ ដែលត្រូវបានរៀបចំឡើងយ៉ាងតឹងតែង និងដែលជារឿយៗត្រូវបានប្រើប្រាស់ជាឧបករណ៍នៃការសម្លុតទារប្រយោជន៍ ពោលគឺមិនមែនជាឧបករណ៍នៃការធ្វើឲ្យមានតុល្យភាពឡើងវិញអ្វីឡើយ»។

ជាមួយគ្នានេះ មេដឹកនាំបារាំងរូបនេះក៏បានជំរុញឲ្យមានការគាំទ្រ និងការគិតគូរឡើងវិញ អំពីអង្គការពាណិជ្ជកម្មពិភពលោក (WTO) ដើម្បីធ្វើឲ្យវាស្របតាមគោលដៅប្រយុទ្ធប្រឆាំងនឹងវិសមភាព និងបម្រែបម្រួលអាកាសធាតុ។

គួរបញ្ជាក់ថា លោក Trump បានដាក់ចេញនូវអត្រាពន្ធយ៉ាងធ្ងន់ធ្ងរជាសកល កាលពីខែមេសា ជាពេលដែលលោកបាននិយាយថា ប្រទេសនានានឹងប្រឈមជាមួយអត្រាពន្ធលើការនាំចូលទៅកាន់សហរដ្ឋអាមេរិក ចាប់ពី ១០ ទៅ ៥០ភាគរយ តែក្រោយមកលោកបានក្រឡាស់វិធានការនោះ ហើយភាគច្រើនបានទម្លាក់កម្រិតឲ្យនៅទាប រយៈពេល ៩០ថ្ងៃ៕