រដ្ឋមន្ត្រីការបរទេសអាមេរិក លោក Marco Rubio ធ្វើជាម្ចាស់ផ្ទះទទួលសមភាគីអូស្ត្រាលី ឥណ្ឌា និងជប៉ុន នៅថ្ងៃអង្គារ (ទី១ ខែកក្កដា) នេះ ជាជំនួបដែលស្វែងរកការជំរុញដល់កិច្ចប្រឹងប្រែង ដើម្បីទប់ទល់នឹងប្រទេសចិន បើទោះបីជាពាណិជ្ជកម្ម និងការមិនចុះសម្រុងទ្វេភាគីផ្សេងទៀត បង្ហាញពីជម្លោះ ក្នុងទំនាក់ទំនងរបស់ប្រទេសទាំងនេះក៏ដោយ។

ប្រទេសទាំង៤ ដែលត្រូវបានស្គាល់ថា ជាសម្ព័ន្ធចតុភាគី ឬ Quad មានក្ដីបារម្ភរួមគ្នា អំពីឥទ្ធិពលដែលកំពុងកើនឡើងរបស់ប្រទេសចិន ប៉ុន្តែទំនាក់ទំនងរបស់ពួកគេ បានចាប់ផ្ដើមអាប់អួ ដោយសារព្យុះភ្លៀងនៃវិធានការដំឡើងពន្ធជាសកលរបស់លោកប្រធានាធិបតី Donald Trump ពោលគឺគ្មានប្រទេសណាមួយក្នុងចំណោមសមាជិក Quad ត្រូវបានលើកលែងនោះទេ។ បញ្ហាផ្សេងទៀត ក៏កំពុងដាក់សម្ពាធលើទំនាក់ទំនងរបស់ប្រទេសទាំងនេះផងដែរ។

លោក Rubio បានធ្វើជាម្ចាស់ផ្ទះកិច្ចប្រជុំនៃរដ្ឋមន្ត្រី Quad ដែលជាការចូលរួមព្រឹត្តិការណ៍ការទូតលើកដំបូងរបស់លោក ក្នុងនាមជារដ្ឋមន្ត្រីការទេស កាលពីថ្ងៃទី២១ ខែមករា ពោលគឺមួយថ្ងៃបន្ទាប់ពីលោក Trump បានចាប់ផ្តើមអាណត្តិទី២ របស់លោក ជាវិធានការមួយ ដើម្បីបញ្ជាក់ពីសារៈសំខាន់របស់តំបន់ឥណ្ឌូប៉ាស៊ីហ្វិក។

បន្ទាប់ពីបញ្ចប់សម័យប្រជុំរួម ជាមួយរដ្ឋមន្ត្រីការបរទេសនៃសម្ព័ន្ធ Quad លោក Rubio ត្រូវបានគេរំពឹងថា នឹងជួបប្រជុំទ្វេភាគីជាមួយលោក Takeshi Iwaya របស់ជប៉ុន លោក Subrahmanyam Jaishankar របស់ឥណ្ឌា និងលោកស្រី Penny Wong របស់អូស្ត្រាលី។ 

អ្នកនាំពាក្យក្រសួងការបរទេសអាមេរិក លោកស្រី Tammy Bruce បានប្រាប់អ្នកសារព័ត៌មានកាលពីថ្ងៃទី៣០ ខែមិថុនាថា ដៃគូ Quad នឹង «បញ្ជាក់ឡើងវិញនូវការប្តេជ្ញាចិត្តរួមរបស់យើង ចំពោះតំបន់ឥណ្ឌូប៉ាស៊ីហ្វិកសេរី និងបើកចំហ»៕