សេតវិមានបាននិយាយថា លោកប្រធានាធិបតី Donald Trump កាលពីថ្ងៃចន្ទ (ទី៣០ ខែមិថុនា) បានចុះហត្ថលេខាលើអនុស្សរណៈដែលដាក់ចេញនូវគោលនយោបាយតឹងរ៉ឹងរបស់សហរដ្ឋអាមេរិក ចំពោះប្រទេសគុយបាដែលគ្រប់គ្រងដោយរបបកុម្មុយនីស្ត និងផ្លាស់ប្ដូរវិធានការដែលដាក់ដោយអតីតប្រធានាធិបតីលោក Joe Biden។

សេតវិមានបានឲ្យដឹងនៅក្នុងឯកសារមួយថា សេចក្តីណែនាំនេះនឹងអនុវត្តច្បាប់ហាមឃាត់ផ្នែកវិស័យទេសចរណ៍របស់សហរដ្ឋអាមេរិក ចំពោះប្រទេសគុយបា ខណៈពេលដែលគាំទ្រដល់ការដាក់ទណ្ឌកម្មសេដ្ឋកិច្ចលើប្រទេសនេះ។

ទោះបីជាប្រជាជនអាមេរិកមិនអាចទៅប្រទេសគុយបា សម្រាប់ដំណើរកម្សាន្តក៏ដោយ ក៏ការធ្វើដំណើរត្រូវបានអនុញ្ញាត សម្រាប់សកម្មភាពនានា ក្នុងនោះមានរួមទាំងផ្នែកអប់រំ ឬមនុស្សធម៌ផងដែរ។

ជាវិធានការមួយ ក្នុងចំណោមវិធានការនានានារបស់លោក បន្ទាប់ពីចូលកាន់តំណែងក្នុងខែមករា លោក Trump ដែលជាអ្នករិះគន់គុយបាយ៉ាងបើកចំហ បានលុបចោលការសម្រេចនៅនាទីចុងក្រោយរបស់រដ្ឋបាលលោក Biden ក្នុងការដកប្រទេសនេះចេញពីបញ្ជីរដ្ឋដែលឧបត្ថម្ភភេរវកម្មរបស់សហរដ្ឋអាមេរិក។ លោកក៏បានរឹតបន្តឹងដោយផ្នែកដល់ការចូលមកកាន់ប្រទេសរបស់ប្រជាជនពីគុយបាផងដែរ។

នៅក្រោមអនុស្សរណៈកាលពីថ្ងៃចន្ទ លោក Trump បានបន្តការហាមឃាត់លើប្រតិបត្តិការហិរញ្ញវត្ថុដោយផ្ទាល់ ឬដោយប្រយោលជាមួយអង្គភាពដែលគ្រប់គ្រងដោយយោធាគុយបា៕