ហ្ស៊កហ្ស៊ីនៅថ្ងៃអង្គារនេះ បានកាត់ទោសមេដឹកនាំប្រឆាំងដ៏លេចធ្លោលោក Nika Gvaramia ឲ្យជាប់ពន្ធនាគារ រយៈពេល ៨ខែ ដែលជាការចាប់ខ្លួនចុងក្រោយបំផុតដែលផ្តោតលើអ្នកនយោបាយ សកម្មជន និងអ្នកសារព័ត៌មាន ដែលរិះគន់គណបក្សកាន់អំណាច។

ប្រទេសបេក្ខភាពរបស់សហភាពអឺរ៉ុប ត្រូវបានរួបរឹតដោយភាពចលាចលនយោបាយ ចាប់តាំងពីការបោះឆ្នោតសភាដែលមានជម្លោះកាលពីខែតុលា ឆ្នាំមុន នៅពេលដែលគណបក្ស Georgian Dream ដែលជាបក្សកាន់អំណាច បានប្រកាសជ័យជម្នះ ដែលបង្កឲ្យមានការតវ៉ាដ៏ធំ។

ក្រុមបាតុករ បានចោទប្រកាន់គណបក្សកាន់អំណាច ដែលបានលុបចោលកិច្ចពិភាក្សាសមាជិកភាពសហភាពអឺរ៉ុប ពីការងាកទៅរកការគ្រប់គ្រងបែបផ្តាច់ការ និងដឹកនាំប្រទេសឲ្យខិតទៅជិតទីក្រុងមូស្គូ ដែលជាការចោទប្រកាន់ដែលរដ្ឋាភិបាលច្រានចោលទាំងស្រុង។

មេធាវីរបស់ខ្លួនលោក Dito Sadzaglishvili បានប្រាប់សារព័ត៌មាន AFPថា  នៅថ្ងៃអង្គារនេះ តុលាការទីក្រុង Tbilisi បានកាត់ទោសលោក Gvaramia ដែលជាសហមេដឹកនាំនៃគណបក្សប្រឆាំងដ៏សំខាន់ Akhali ឲ្យជាប់ពន្ធនា គាររយៈពេល ៨ខែ និងបានរារាំងលោកពីការកាន់តំណែងសាធារណៈ រយៈពេលពីរឆ្នាំ។  

លោកបាននិយាយថា៖ «សាលក្រមនេះ មិនស្របច្បាប់ និងជាផ្នែកមួយនៃការប៉ុនប៉ងរបស់រដ្ឋាភិបាល ក្នុងការបង្ក្រាបក្រុមមប្រឆាំង នៅក្នុងរដ្ឋហ្ស៊កហ្ស៊ី។