តាមរយៈកម្មវិធីផ្ញើសារ Telegram លោកអភិបាល Alexander Brechalov នៅថ្ងៃអង្គារ (ទី១ ខែកក្កដា) បានឲ្យដឹងថា មនុស្ស ៣នាក់ បានបាត់បង់ជីវិត ហើយ ៣៥នាក់ផ្សេងទៀតបានរងរបួស អំឡុងការវាយប្រហារដោយយានដ្រូនរបស់អ៊ុយក្រែនទៅលើរោងចក្រ នៅក្នុងទីក្រុង Izhevsk របស់រុស្ស៊ី។

យ៉ាងណាក្ដី លោក Brechalov មិនបានបញ្ចេញឈ្មោះរោងចក្រដែលត្រូវបានវាយប្រហារនោះទេ ប៉ុន្តែមន្ត្រីសន្តិសុខអ៊ុយក្រែនម្នាក់បានប្រាប់សារព័ត៌មាន Reuters ថា យ៉ាងហោចណាស់យានដ្រូនបើករយៈចម្ងាយឆ្ងាយចំនួន ២ ដែលប្រតិបត្តិការដោយសេវាសន្តិសុខអ៊ុយក្រែន បានវាយប្រហាររោងចក្រ Kupol ដែលផលិតយានដ្រូន និងប្រព័ន្ធការពារអាកាស ដោយបានបណ្តាលឲ្យមានអគ្គិភ័យឆាបឆេះឡើង។

សំណុំផ្សែងខ្មៅអាចត្រូវបានគេមើលឃើញហុយទ្រលោមឡើងទៅលើមេឃ ពីទីតាំងមានអគ្គិភ័យ នៅតំបន់មានអគារច្រើន នៅក្នុងរូបភាពវីដេអូដែលត្រូវបានចែករំលែកដោយមន្ត្រីអ៊ុយក្រែន ដែលបាននិយាយថា រោងចក្រផលិត និងឃ្លាំង ត្រូវបានវាយប្រហារ។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់បានដោយឯករាជ្យ ជុំវិញការអះអាងនេះឡើយ។ លោក Brechalov បានបប្រាប់ថា លោកបានជូនដំណឹងទៅប្រធានាធិបតីរុស្ស៊ី លោក Vladimir Putin អំពីហេតុការណ៍នេះ៕