រដ្ឋធានីរបស់ប្រទេសឥណ្ឌា បានហាមប្រាមមិនឲ្យលក់ប្រេងឥន្ធនៈឲ្យយានយន្តចាស់ៗ នៅថ្ងៃអង្គារ (ទី១ ខែកក្កដា) នេះ ខណៈដែលអាជ្ញាធរព្យាយាមដោះស្រាយការបំពុលបរិយាកាសដ៏គ្រោះថ្នាក់របស់ទីក្រុងធំមួយនេះ។

ទីក្រុងនេះបានជាប់ចំណាត់ថ្នាក់ជាទីក្រុងមួយ ក្នុងចំណោមរដ្ឋធានីដែលមានការបង្កកខ្វក់បរិយាកាសខ្លាំងបំផុត នៅលើពិភពលោក ដោយផ្សែងអ័ព្ទដែលមានក្លិនអាក្រក់គ្របដណ្តប់លើផ្ទៃមេឃរៀងរាល់រដូវរងា។

នៅកម្រិតខ្ពស់បំផុតរនៃផ្សែងអ័ព្ទនេះ កម្រិតនៃកំហាប់ភាគល្អិតនិចល PM2.5 ជាមីក្រូភាគល្អិតបង្កជំងឺមហារីកដ៏គ្រោះថ្នាក់ដែលមានទំហំតូចល្មមអាចចូលទៅក្នុងចរន្តឈាមតាមរយៈសួត កើនឡើងដល់ច្រើនជាង ៦០ដងនៃចំនួនអតិបរមាប្រចាំថ្ងៃដែលត្រូវបានណែនាំដោយអង្គការសុខភាពពិភពលោក (WHO)។

គួររំលឹកថា រថយន្តប្រើសាំងដែលមានអាយុកាលលើសពី ១៥ឆ្នាំ និងរថយន្តម៉ាស៊ូតដែលមានអាយុកាលលើសពី ១០ឆ្នាំ ត្រូវបានហាមឃាត់រួចហើយមិនឲ្យបើកបរនៅលើផ្លូវ ក្នុងទីក្រុង New Delhi តាមរយៈសេចក្តីសម្រេចរបស់តុលាការកំពូលឆ្នាំ២០១៨។ ប៉ុន្តែមនុស្សរាប់លាននាក់ មិនគោរពច្បាប់នេះឡើយ។

យោងតាមតួលេខផ្លូវការ បានឲ្យដឹងថា រថយន្តជាង ៦លានគ្រឿង កំពុងចរាចរនៅតាមដងផ្លូវក្នុងទីក្រុងនេះ។ បម្រាមដែលចូលជាធរមាននៅថ្ងៃទី១ ខែកក្កដានេះ ព្យាយាមរារាំងមិនឲ្យរថយន្តទាំងនោះបានចាក់សាំង។ នគរបាល និងបុគ្គលិកក្រុង ត្រូវបានដាក់ពង្រាយតាមស្ថានីយ៍ប្រេងឥន្ធនៈ នៅទូទាំងទីក្រុង Delhi ជាកន្លែងដែលកាមេរ៉ាសម្គាល់ស្លាកលេខ និងឧបករណ៍បំពងសំឡេង ត្រូវបានដំឡើង៕