មន្ត្រីជាន់ខ្ពស់មួយរូបរបស់អង្គការសហប្រជាជាតិ បានព្រមានកាលពីថ្ងៃចន្ទសប្ដាហ៍នេះថា វិបត្តិមនុស្សធម៌នៅដែនដីហ្កាហ្សា កំពុងតែកើតមានក្នុងកម្រិតដ៏ធ្ងន់ធ្ងរគួរឱ្យបារម្ភ ដោយហៅទុក្ខវេទនានេះថា "មិនអាចទ្រាំបាន" និងថ្កោលទោស "ការដាក់ទណ្ឌកម្មរួមលើប្រជាជនប៉ាឡេស្ទីន" ថាជារឿងមិនយុត្តិធម៌ទាល់តែសោះ។

ថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិ ឧបការីអគ្គលេខាធិការប្រចាំតំបន់មជ្ឈិមបូព៌ា លោក Khaled Khiari បានរាយការណ៍ថា ជនជាតិប៉ាឡេស្ទីនជាង ១.០០០នាក់ ត្រូវបានសម្លាប់ចាប់តាំងពីពាក់កណ្តាលខែមិថុនាមក ដោយការស្លាប់ជាច្រើនកើតឡើងនៅពេលកំពុងស្វែងរកជំនួយ។ អាជ្ញាធរសុខាភិបាលហ្កាហ្សារាយការណ៍ថា អ្នកស្លាប់ប៉ាឡេស្ទីនកើនឡើងដល់ជាង ៥៦.៥០០នាក់ហើយ ចាប់តាំងពីថ្ងៃទី០៧ខែតុលា ឆ្នាំ២០២៣ មក។

វិបត្តិកាន់តែធ្ងន់ធ្ងរឡើងដោយការបិទផ្លូវទាំងស្រុងអស់មួយខែរបស់អ៊ីស្រាអែល លើជំនួយសំខាន់ៗ រួមមានស្បៀងអាហារ ទឹក អគ្គិសនី ប្រេងឥន្ធនៈ និងឱសថជាដើម។ ប្រធានទីភ្នាក់ងារអង្គការសហប្រជាជាតិជាច្រើនបាននិយាយថា ការរាំងខ្ទប់ជំនួយនេះអាចស្មើនឹងការដាក់ទណ្ឌកម្មរួម និងការបង្អត់អាហារជាវិធីសាស្រ្តនៃសង្គ្រាម ហើយបង្ហាញពី "ការមិនយកចិត្តទុកដាក់ចំពោះជីវិតមនុស្ស"។

គិតត្រឹមខែមិថុនាកន្លងទៅ ហានិភ័យនៃគ្រោះទុរ្ភិក្សនៅហ្កាហ្សា ទំនងជាកើតឡើងកាន់តែខ្លាំង ដោយកម្មវិធីស្បៀងអាហារពិភពលោក WFP បានរាយការណ៍ថាខ្លួនអស់ស្តុកអាហារហើយ ខណៈដែលតួលេខ ៩១% នៃចំនួនប្រជាជនសរុបនៅហ្កាហ្សា កំពុងប្រឈមនឹងអសន្តិសុខស្បៀងកម្រិតវិបត្តិ។ អត្រាកង្វះអាហារូបត្ថម្ភធ្ងន់ធ្ងរក្នុងចំណោមកុមារតូចៗ ក៏បានកើនកាន់តែអាក្រក់ផងដែរ៕