ប្រធានាធិបតីអាមេរិក លោក Donald Trump កាលពីថ្ងៃអង្គារ (០១ កក្កដា) បានគំរាមកាត់ផ្តាច់ប្រាក់ឧបត្ថម្ភធនរាប់ពាន់លានដុល្លារដែលក្រុមហ៊ុននានារបស់លោកមហាសេដ្ឋី Elon Musk ទទួលបានពីរដ្ឋាភិបាលសហព័ន្ធ រួមទាំង Tesla និង SpaceX នៅក្នុងការកើនឡើងនៃសង្រ្គាមពាក្យសម្តីជាថ្មីម្ដងទៀតរវាងប្រធានាធិបតីអាមេរិក និងបុរសមានទ្រព្យបំផុតម្នាក់របស់ពិភពលោក ខណៈសម្ព័ន្ធមិត្តដែលធ្លាប់តែស្អិតរមួត បានដួលរលំភ្លាមៗចាប់តាំងពីការប៉ះទង្គិចលើកមុនមក។

ជម្លោះបានបញ្ឆេះឡើងជាថ្មីកាលពីថ្ងៃចន្ទសប្ដាហ៍នេះ នៅពេលលោក Musk ដែលបានចាយប្រាក់រាប់រយលានក្នុងការបោះឆ្នោតឡើងវិញរបស់លោក Trump បានបន្តការរិះគន់របស់លោកចំពោះសេចក្ដីស្នើច្បាប់កាត់បន្ថយពន្ធក្នុងស្រុក និងការចំណាយរបស់លោក Trump នៅក្នុងជំហានមួយដែលអាចនឹងលុបចោលការឧបត្ថម្ភធនសម្រាប់ការទិញរថយន្តអគ្គិសនី ដែលបានផ្តល់អត្ថប្រយោជន៍ជាច្រើនដល់ក្រុមហ៊ុនផលិតរថយន្ត EV ឈានមុខគេរបស់អាមេរិក Tesla។ ច្បាប់នោះបានឆ្លងផុតព្រឹទ្ធសភាក្នុងសំឡេងគាំទ្រដ៏ស្ដួចស្ដើងត្រឹមពាក់កណ្តាលថ្ងៃអង្គារដដែលនេះ។

លោក Trump បានប្រាប់អ្នកយកព័ត៌មាននៅសេតវិមានក្នុងអង្គារថា "លោក Musk ខកចិត្តដែលបាត់បង់អត្ថប្រយោជន៍ EV របស់ខ្លួន ហើយលោកតូចចិត្តនឹងរឿងជាច្រើន ប៉ុន្តែលោកក៏អាចនឹងបាត់បង់កាន់ច្រើនទៀតដែរ"។ បន្ទាប់ពីភាពតានតឹងនេះ ភាគហ៊ុន Tesla ធ្លាក់ចុះជាង ៥% នៅថ្ងៃអង្គារ។

នាយកប្រតិបត្តិក្រុមហ៊ុន Tesla រូបនេះបានគំរាមបង្កើតគណបក្សនយោបាយថ្មីមួយ និងចំណាយប្រាក់ទម្លាក់អាសនៈរបស់សមាជិកសភាណាដែលគាំទ្រច្បាប់ពន្ធនោះ។ សមាជិកបក្សសាធារណរដ្ឋបារម្ភថា ជម្លោះម្តងហើយម្តងទៀតរបស់លោក Musk ជាមួយលោក Trump អាចប៉ះពាល់ឱកាសក្នុងការការពារសំឡេងភាគច្រើនរបស់ពួកគេ នៅការបោះឆ្នោតសភាពាក់កណ្តាលអាណត្តិឆ្នាំ២០២៦ ខាងមុខ៕