ក្រុមអ្នកគាំទ្រគណបក្សប្រឆាំងនៅប្រទេសទួរគីរាប់ពាន់នាក់ បានមកប្រមូលផ្តុំគ្នានៅខាងក្រៅអគារសាលាក្រុងអ៊ីស្តង់ប៊ុល កាលពីថ្ងៃអង្គារក្នុងការប្រមូលផ្តុំគ្នាដើម្បីប្រារព្ធរយៈពេល១០០ថ្ងៃ ចាប់តាំងពីការឃុំខ្លួនអភិបាលក្រុង លោក Ekrem Imamoglu ដែលត្រូវបានគេបណ្តេញចេញ។ ហ្វូងមនុស្ស បានស្រែកប្រឆាំងរដ្ឋាភិបាល និងគាំទ្រលោក Imamoglu អំឡុងពេលការប្រមូលផ្តុំគ្នា។

គណបក្សសាធារណរដ្ឋប្រជាមានិតប្រជាធិបតេយ្យ (CHP) ដែលជាបក្សប្រឆាំងធំរបស់ប្រទេសទួរគីបានប្រដូចការឃុំខ្លួននិងការចាប់ខ្លួនលោក Imamoglu ជាបន្តបន្ទាប់ ដែលជាបេក្ខជនប្រធានាធិបតីរបស់ខ្លួន ទៅនឹងរដ្ឋប្រហារ។ គណបក្ស AK របស់លោក Erdogan និយាយថា តុលាការមានភាពឯករាជ្យ។

លោក Ozgur Ozel មេដឹកនាំគណបក្ស CHP បាននិយាយនៅឯការប្រមូលផ្តុំគ្នាថា «រដ្ឋប្រហារនេះមានមេដឹកនាំ»។

លោក Recep Tayyip Erdogan ដែលបានជាប់ឆ្នោតជាប្រធានាធិបតី និងត្រូវបានផ្តល់អំណាចដោយប្រជាជន ពុំមែនជាប្រធានាធិបតីទៀតទេ ប៉ុន្តែជាមេដឹកនាំរបបយោធា។ នៅកន្លែងប្រមូលផ្តុំគ្នា បាតុករជាច្រើនរយនាក់បានប៉ះទង្គិចជាមួយនគរបាល ដែលបានបាញ់ម្សៅម្រេចដើម្បីបំបែកក្រុមបាតុករ ខណៈបាតុករជាច្រើននាក់ ទំនងជាត្រូវបានឃុំខ្លួន។

នគរបាលបង្ក្រាបកុប្បកម្មបានរុញច្រានបាតុករឲ្យត្រឡប់ទៅវិញ ខណៈពួកគេរុញច្រានរបាំងរបស់នគរបាល។ នគរបាលក្នុងសម្លៀកបំពាក់ធម្មតា បានឃាត់ខ្លួនក្រុមបាតុករដែលមិនព្រមចាកចេញពីតំបន់នោះបន្ទាប់ពីការប៉ះទង្គិចគ្នា។ បាតុករម្នាក់បាននិយាយថា «យើងមកទីនេះ នៅថ្ងៃនេះ ដើម្បីប្រឆាំងនឹងភាពគ្មានច្បាប់ និងសម្រាប់អភិបាលក្រុងដែលត្រូវបានគេចាប់ខ្លួន និងមានកំហឹងចំពោះនគរបាលប្រឆាំងនឹងនិស្សិត»។