ប្រធានមន្ទីរយុត្តិធម៌ប្រចាំរដ្ឋ California លោក Rob Bonta បានចោទប្រកាន់កាលពីថ្ងៃអង្គារ (០១ កក្កដា) ថា រដ្ឋបាលរបស់លោកប្រធានាធិបតីអាមេរិក Donald Trump បានរំលោភលើច្បាប់ឯកជនភាពរបស់សហព័ន្ធ នៅពេលខ្លួនបញ្ចេញទិន្នន័យសុខភាព Medicaid របស់ពលរដ្ឋចុះឈ្មោះរាប់លាននាក់ ទៅឱ្យក្រុមមន្ត្រីនិរទេសកាលពីខែមុន ដោយនិយាយថា រូបលោក និងប្រធានរដ្ឋអាជ្ញាប្រចាំរដ្ឋចំនួន ១៩ផ្សេងទៀត បានរួមគ្នាដាក់បណ្ដឹង ជុំវិញសកម្មភាពនេះ។

ក្រុមទីប្រឹក្សារបស់រដ្ឋមន្រ្តីក្រសួងសុខាភិបាល លោក Robert F. Kennedy Jr. បានបញ្ជាឱ្យចេញផ្សាយសំណុំទិន្នន័យ ដែលរួមមានព័ត៌មានសុខភាពឯកជនរបស់ប្រជាជនរស់នៅក្នុងរដ្ឋ California, Illinois, រដ្ឋ Washington និង Washington D.C. ទៅឱ្យក្រសួងសន្តិសុខមាតុភូមិ នេះបើតាមសេចក្ដីរាយការណ៍ដំបូងគេរបស់សារព័ត៌មាន AP កាលពីខែមុន។

រដ្ឋទាំងនោះអនុញ្ញាតឱ្យប្រជាជនដែលមិនមែនជាពលរដ្ឋពេញសិទ្ធិរបស់អាមេរិក អាចចុះឈ្មោះក្នុងកម្មវិធីសុខភាព Medicaid ដែលបង់ថ្លៃដល់ការចំណាយរបស់ពួកគេដោយប្រើតែប្រាក់របស់អ្នកជាប់ពន្ធរដ្ឋប៉ុណ្ណោះ។ ការចែករំលែកទិន្នន័យមិនធម្មតានៃព័ត៌មានសុខភាពឯកជន រួមទាំងអាសយដ្ឋាន ឈ្មោះ លេខសន្តិសុខសង្គម ស្ថានភាពអន្តោប្រវេសន៍ និងទិន្នន័យទាមទារសម្រាប់អ្នកចុះឈ្មោះក្នុងរដ្ឋទាំងនោះ ត្រូវបញ្ចូនឱ្យមន្ត្រីនិរទេស ខណៈពួកគេពន្លឿនការអនុវត្តច្បាប់ទូទាំងប្រទេស។



ក្រុមអ្នកជំនាញនិយាយថា ទិន្នន័យនេះអាចប្រើដើម្បីជួយក្រសួងសន្តិសុខមាតុភូមិ កំណត់ទីតាំងជនអន្តោប្រវេសន៍ ក្នុងយុទ្ធនាការនិរទេសទ្រង់ទ្រាយធំរបស់ខ្លួន។ លោក Bonta និយាយថា ការបញ្ចេញទិន្នន័យផ្ទាល់ខ្លួនបែបនេះ បានរំលោភយ៉ាងធ្ងន់ធ្ងរលើច្បាប់ការពារឯកជនភាពសុខភាពរបស់សហព័ន្ធ រួមទាំងច្បាប់ធានារ៉ាប់រងសុខភាព និងគណនេយ្យភាព (HIPAA) ផងដែរ៕