សេតវិមានបាននិយាយថា សហរដ្ឋអាមេរិក បានផ្អាកការដឹកជញ្ជូនអាវុធមួយចំនួនទៅកាន់ទីក្រុងគីវ ខណៈសង្រ្គាមរបស់រុស្ស៊ី ប្រឆាំងនឹងអ៊ុយក្រែន កាន់តែខ្លាំងក្លា។ អ្នកនាំពាក្យសេតវិមាន លោកស្រី Anna Kelly បាននិយាយកាលពីថ្ងៃអង្គារ (០១ កក្កដា) ថា ការសម្រេចចិត្តនេះធ្វើឡើង "ដើម្បីដាក់ផលប្រយោជន៍អាមេរិកជាធំ" ហើយអនុវត្តតាមការត្រួតពិនិត្យរបស់ក្រសួងការពារជាតិអំពី "ការគាំទ្រ និងជំនួយផ្នែកយោធារបស់សហរដ្ឋអាមេរិក ដល់ប្រទេសដទៃ"។

យោងតាមប្រភពចំនួន២ ដែលដឹងពីការសម្រេចចិត្តនេះបាននិយាយថា មន្ទីរបញ្ចកោណបានបញ្ឈប់ការដឹកជញ្ជូនមីស៊ីលការពារដែនអាកាស និងគ្រាប់បែកកំណត់គោលដៅផ្សេងទៀតទៅកាន់អ៊ុយក្រែន ជុំវិញការព្រួយបារម្ភថា ឃ្លាំងស្តុកសព្វាវុធរបស់ទីក្រុងវ៉ាស៊ីនតោន មានកម្រិតទាបខ្លាំងពេក។

ប្រភពលើកឡើងថា ភាពយឺតយ៉ាវលើការដឹកជញ្ជូនអាវុធមួយចំនួនដែលបានសន្យាឱ្យទៅកាន់ទីក្រុងគីវ ដោយរដ្ឋបាលរបស់លោកអតីតប្រធានាធិបតី Joe Biden នេះ បានកើតឡើងក្នុងប៉ុន្មានថ្ងៃថ្មីៗនេះ ដោយឧបករណ៍ស្ទាក់ចាប់ការពារដែនអាកាស ដើម្បីជួយបាញ់ទម្លាក់យានដ្រូន និងគ្រាប់ផ្លោងរបស់រុស្ស៊ី គឺស្ថិតក្នុងចំណោមគ្រឿងយុទ្ធោបករណ៍ដែលត្រូវបានពន្យារពេលទាំងនោះ។

នៅក្នុងសារអ៊ីមែលមួយ មន្ទីរបញ្ចកោណបាននិយាយថា ខ្លួនកំពុងផ្តល់ជម្រើសមួយចំនួនដល់លោកប្រធានាធិបតីអាមេរិក Donald Trump ដើម្បីបន្តជំនួយយោធាដល់អ៊ុយក្រែន ឱ្យស្របតាមគោលដៅនៃការបញ្ចប់សង្រ្គាមរបស់រុស្ស៊ី នៅទីនោះ។ អាមេរិកបានបញ្ជូនជំនួយយោធារាប់សិបពាន់លានដុល្លារទៅឱ្យអ៊ុយក្រែន ចាប់តាំងពីរុស្ស៊ី បើកប្រតិបត្តិការយោធាក្នុងខែកុម្ភៈ ឆ្នាំ២០២២ ដែលនាំឱ្យរដ្ឋបាលលោក Trump សម្ដែងក្ដីបារម្ភថា ឃ្លាំងស្តុករបស់សហរដ្ឋអាមេរិក មានកម្រិតទាបខ្លាំងពេក៕