បណ្ដាគណបក្សនយោបាយ ក៏ដូចជាមន្ត្រីរាជការ និងមហាជនជាប្រជាពលរដ្ឋខ្មែរ បាន​បង្ហាញ​ការ​គាំទ្រ ចំពោះគំនិតផ្ដួចផ្ដើមបស់សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា ឱ្យ​រៀប​ចំ​ធ្វើ​វិសោធនកម្មរដ្ឋធម្មនុញ្ញ ដកហូតសញ្ជាតិខ្មែរ ពីបុគ្គលជ្រុលនិយម ដែលគប់គិត​ជាមួ​យ​បរទេស​ធ្វើ​សកម្ម​ភាពបំផ្លាញជាតិខ្មែរ បំផ្លាញផលប្រយោជន៍ជាតិ។

លោក គុជ លី ប្រធានគណបក្សខ្មែរតែមួយ ក៏ដូចជាមន្ត្រី​រាជ​ការ​បម្រើ​ការងារ​ជូន​ពលរដ្ឋ​នៅតា​ម​មូល​ដ្ឋាន បានបង្ហាញនូវការគាំទ្រទាំងស្រុង ទៅលើវិសោធនកម្ម​ច្បាប់​ដើម្បី​ឱ្យមា​ន​ការ​ដក​ហូត​សញ្ជាតិ​ពី​បុគ្គលជ្រុលនិយមដែលជាជនជាតិខ្មែរ។ ការចេញគាំទ្រជាបន្តបន្ទាប់ ពីគណបក្សនយោបាយ ក៏ដូចជាមន្ត្រីរាជការ និងប្រជាពលរដ្ឋដែលមានសញ្ជាតិជាខ្មែរនេះ ក៏ស្របពេលដែល ក្រុមប្រឹក្សាធម្មនុញ្ញ បើកកិច្ចប្រជុំពេញអង្គពិភាក្សាលើសេចក្ដីស្នើសុំធ្វើវិសោធនកម្មរដ្ឋធម្មនុញ្ញមាត្រា ៣៣ ដើម្បីដកហូតសញ្ជាតិខ្មែរពីបុគ្គលដែលក្បត់ជាតិខ្មែរខ្លួនឯង ឃុបឃិតជាមួយបរទេស ធ្វើសកម្មភាពបំផ្លាញជាតិខ្មែរ។

លោក គុជ លី ក្នុងនាមជាប្រធានគណបក្សខ្មែរតែមួយ និងជាជនជាតិខ្មែរមួយរូប បានចាត់ទុកការធ្វើវិសោធនកម្មច្បាប់នេះ គឺជារឿងចំណេញសម្រាប់ជាតិ ក្នុងការវិសោធនកម្មលើមាត្រានេះ។ លោកលើកឡើងថា ការធ្វើវិសោធនកម្មដកហូតសញ្ជាតិនេះ គឺកកើតមានឡើងនៅប្រទេសជាច្រើនមកហើយ ហើយវាក៏ជាភាពចាំបាច់សម្រាប់កម្ពុជាក្នុងពេលបច្ចុប្បន្ន និងទៅអនាគតផងដែរ។

ចំណែកមន្ត្រីរាជការបំពេញការងារនៅ សាលាសង្កាត់ ដង្កោ រាជធានីភ្នំពេញវិញ លើកឡើងដែរថា ជាជនខ្មែរ គឺត្រូវមានសាមគ្គីភាព ត្រូវស្រឡាញ់ជាតិ និងត្រូវញគិតពីផលប្រយោជន៍ជាតិជាធំ។ ករណីជាជនជាតិខ្មែរ តែធ្វើខុសឆ្គង ទៅគប់គិតបរទេសបំផ្លាញជាតិសាសន៍ខ្មែវិញ គឺមិនសាកសមជាជនជាតិខ្មែរទៀតនោះឡើយ។

សូមបញ្ជាក់ថា សម្តេចតេជោ ហ៊ុន សែន ប្រធានព្រឹទ្ធសភា បានស្នើឱ្យរដ្ឋមន្រ្តីក្រសួងយុត្តិធម៌ ពិចារណាក្នុងការធ្វើវិសោធនកម្មច្បាប់រដ្ឋធម្មនុញ្ញ ដើម្បីដកសញ្ជាតិជនទាំងឡាយដែលគប់គិតជាមួយបរទេសបំផ្លាញខ្មែរ។ សម្តេចតេជោ ហ៊ុន សែន បានថ្លែងបែបនេះ នៅក្នុងពិធីសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ក្នុងខេត្តព្រះវិហារ នៅព្រឹកថ្ងៃទី២៧ ខែមិថុនា ឆ្នាំ២០២៥៕ អត្ថបទ៖ គឹមហុក