រដ្ឋបាលក្នុងតំបន់ បានដាក់ការរឹតបន្តឹងរយៈពេល ៣០ថ្ងៃ លើការធ្វើដំណើររបស់ប្រជាជន និងយានជំនិះចាប់ពីព្រលប់រហូតដល់ព្រឹកព្រលឹម នៅក្នុងស្រុក North Waziristan របស់ប្រទេសប៉ាគីស្ថាន បន្ទាប់ពី ទាហានប៉ាគីស្ថានចំនួន ១៣នាក់ ត្រូវបានសម្លាប់ ក្នុងការវាយប្រហារអត្តឃាត។

មន្ត្រីរដ្ឋាភិបាលក្នុងតំបន់ និងនគរបាល បាននិយាយកាលពីថ្ងៃទី ២៨ មិថុនាថា ការវាយប្រហារអត្តឃាតដែលត្រូវបានអះអាងដោយក្រុមតាលីបង់ប៉ាគីស្ថាន Hafiz Gul Bahadur ក៏បានបង្កឲ្យមនុស្ស ២៩នាក់រងរបួស ក្នុងនោះមានជនស៊ីវិលផងដែរ នៅក្នុងស្រុកដែលអស្ថិរភាព ជាប់ព្រំដែនប្រទេសអាហ្វហ្គានី ស្ថាន។

ចាប់តាំងពីចុងឆ្នាំ ២០២២ ប៉ាគីស្ថានបានប្រឹងប្រែងក្នុងការទប់ស្កាត់ការកើនឡើងអំពើហិង្សា នៅភាគពាយព្យរបស់ខ្លួន ជាកន្លែងដែលក្រុមតាលីបង់ប៉ាគីស្ថាន ឬ Tehreek-e-Taliban Pakistan (TTP) និងក្រុមសកម្មប្រយុទ្ធផ្សេងទៀត បានកំណត់គោលដៅជាញឹកញាប់លើរថយន្តរបស់កងកម្លាំងសន្តិសុខ និងប៉ុស្តិ៍ត្រួតពិនិត្យ អ្នកអនុវត្តច្បាប់ និងមន្ត្រីរដ្ឋាភិបាល។

យោងតាមការិយាល័យស្នងការរងនរគបាលស្រុក North Waziristan បានឲ្យដឹងថា មានតម្រូវការក្នុងការរឹតបន្តឹងគ្រប់ប្រភេទនៃការធ្វើដំណើរ នៅក្នុងស្រុកនេះ ដើម្បីផលប្រយោជន៍នៃ «សុវត្ថិភាពសាធារណៈ ច្បាប់ និងសណ្តាប់ធ្នាប់ ចលនារបស់កងកម្លាំងសន្តិសុខ និង ដើម្បីរឹតបន្តឹងការធ្វើដំណើររបស់ក្រុមឧក្រិដ្ឋជន»។