ក្រុមប្រទេសនៃសម្ព័ន្ធចតុភាគី ឬ Quad ដែលមានសហរដ្ឋអាមេរិក ឥណ្ឌា ជប៉ុន និងអូស្ត្រាលី កាលពីថ្ងៃអង្គារ (ទី១ ខែកក្កដា) បានអំពាវនាវឲ្យនាំខ្លួនជនល្មើសនៃការវាយប្រហាររបស់ក្រុមសកម្មប្រយុទ្ធឥស្លាម ដែលបានសម្លាប់មនុស្ស ២៦នាក់ នៅតំបន់កាស្មៀរគ្រប់គ្រងដោយប្រទេសឥណ្ឌា ទៅកាត់ទោសឲ្យបានឆាប់។

គួររំលឹកថា ការវាយប្រហារកាលពីថ្ងៃទី២២ ខែមេសា បានបង្កឲ្យមានការប្រយុទ្ធគ្នាយ៉ាងខ្លាំងក្លា រវាងឥណ្ឌា និងប៉ាគីស្ថានដែលប្រដាប់ដោយអាវុធនុយក្លេអ៊ែរ ជាការកើនឡើងនូវភាពតានតឹងចុងក្រោយរវាងគូអរិដែលមានជម្លោះជាមួយគ្នារាប់ទសវត្សរ៍មកហើយ ខណៈដែលឥណ្ឌាបានទម្លាក់កំហុសទៅលើប៉ាគីស្ថានដែលបានបដិសេធមិនទទួលខុសត្រូវចំពោះហេតុការណ៍នោះ និងអំពាវនាវឲ្យមានការស៊ើបអង្កេតអព្យាក្រឹត។

ក្រសួងការបរទេសសហរដ្ឋអាមេរិក បានចេញសេចក្តីថ្លែងការណ៍រួមមួយរបស់រដ្ឋមន្ត្រីការបរទេសនៃក្រុម Quad ដែលបានជួបប្រជុំគ្នា នៅទីក្រុងវ៉ាស៊ីនតោន ប៉ុន្តែមិនបានលើកពីឈ្មោះរបស់ប៉ាគីស្ថាន ឬដាក់កំហុសទៅលើទីក្រុងអ៊ីស្លាម៉ាបាដឡើយ។

នៅក្នុងសេចក្តីថ្លែងការណ៍នោះ រដ្ឋមន្ត្រីបានលើកឡើងថា៖ «ក្រុម Quad ថ្កោលទោសយ៉ាងដាច់អហង្ការ ចំពោះរាល់សកម្មភាពនៃអំពើភេរវកម្ម និងអំពើជ្រុលនិយមដ៏ឃោរឃៅគ្រប់ទម្រង់ និងគ្រប់ការបង្ហាញរបស់សកម្មភាពទាំងនោះ ក្នុងនោះរួមទាំងអំពើភេរវកម្មឆ្លងដែនផងដែរ»។

រដ្ឋមន្ត្រីនៃក្រុមនេះបានអំពាវនាវដល់សមាជិកទាំងអស់របស់អង្គការសហប្រជាជាតិ (UN) ឲ្យសហការយ៉ាងសកម្មជាមួយ «អាជ្ញាធរពាក់ព័ន្ធទាំងអស់» ដើម្បីដាក់ទោស «ជនល្មើស អ្នករៀបចំគម្រោង និងអ្នកផ្តល់ហិរញ្ញប្បទាន នៃទង្វើដ៏សែនអាក្រក់នេះ» ដោយគ្មានការពន្យារពេលជាដាច់ខាត៕