ទីភ្នាក់ងារសារព័ត៌មាន Press TV និង Mehr បានរាយការណ៍ថា ប្រធានាធិបតីអ៊ីរ៉ង់ លោក ម៉ាស៊ូដ ប៉េហ្សេស្គីអាន (Masoud Pezeshkian) បានប្រកាសនៅថ្ងៃពុធនេះអំពីការផ្អាកកិច្ចសហប្រតិបត្តិការរបស់ប្រទេសលោកជាមួយទីភ្នាក់ងារថាមពលអាតូមិកអន្តរជាតិ (IAEA)។

ទីភ្នាក់ងារសារព័ត៌មាន Tasnim ពាក់កណ្តាលផ្លូវការ ក៏បានរាយការណ៍ផងដែរថា លោកប្រធានាធិបតីបានអនុម័តច្បាប់ដែលតម្រូវឱ្យរដ្ឋាភិបាលផ្អាកទំនាក់ទំនងជាមួយទីភ្នាក់ងារ IAEA។ កាលពីសប្តាហ៍មុន សភារបស់ប្រទេសអ៊ីរ៉ង់ បានអនុម័តច្បាប់ដើម្បីផ្អាកកិច្ចសហប្រតិបត្តិការជាមួយទីភ្នាក់ងារ IAEA ។

ចំណាត់ការនេះ ធ្វើឡើងបន្ទាប់ពីភាពតានតឹងកើនឡើងកាន់តែខ្លាំងរវាងទីក្រុងតេអេរ៉ង់ និងអង្គការឃ្លាំមើលនុយក្លេអ៊ែររបស់អង្គការសហប្រជាជាតិជុំវិញការត្រួតពិនិត្យដំណើរការ និងតម្លាភាព បន្ទាប់ពីមានការប្រឈមមុខដាក់គ្នាដោយយោធាជាមួយអ៊ីស្រាអែល និងសហរដ្ឋអាមេរិក។

ជម្លោះរយៈពេល១២ថ្ងៃរវាងអ៊ីស្រាអែល និងអ៊ីរ៉ង់ បានផ្ទុះឡើងកាលពីថ្ងៃទី១៣ ខែមិថុនា នៅពេលដែលអ៊ីស្រាអែល បានចាប់ផ្តើមវាយប្រហារតាមអាកាសទៅលើទីតាំងយោធា និងនុយក្លេអ៊ែររបស់អ៊ីរ៉ង់។

ទីក្រុងតេអេរ៉ង់ បានបាញ់មីស៊ីលសងសឹក និងបានវាយប្រហារដោយយានដ្រូន ខណៈអាមេរិក បានទម្លាក់គ្រាប់បែកលើរោងចក្រនុយក្លេអ៊ែរអ៊ីរ៉ង់ចំនួនបីកន្លែង។ ជម្លោះនេះ បានឈានដល់ការបញ្ចប់ ក្រោមបទឈប់បាញ់គាំទ្រដោយសហរដ្ឋអាមេរិក ដែលបានចូលជាធរមាននៅថ្ងៃទី ២៤ ខែមិថុនា។