វិទ្យាស្ថានសិក្សាអំពីសង្គ្រាម (ISW) ឲ្យដឹងថា ប្រទេសរុស្ស៊ីមានមហិច្ឆតាគ្រប់គ្រងដែនដីយ៉ាងទូលំទូលាយ នៅក្នុងប្រទេសអ៊ុយក្រែន ដែលមិនត្រឹមតែតំបន់គ្រីម៉ា និងតំបន់កាន់កាប់ទាំង ៤ បច្ចុប្បន្ននេះទេ។

អ្នកវិភាគរបស់ ISW ជឿជាក់ថា ប្រធានាធិបតីរុស្ស៊ី លោក Vladimir Putin និងមជ្ឈដ្ឋានខាងក្នុងរបស់លោក កំពុងប្រើប្រាស់ការនិទានរឿងរ៉ាវ អំពីតំបន់ «Donbas» «Novorossiya» និង «ប្រជាជនតែមួយ» ដើម្បីបង្ហាញអំពីភាពត្រឹមត្រូវនៃការអះអាងសិទ្ធិរបស់ខ្លួន។ ការលើកឡើងនេះ បង្ហាញថា មហិច្ឆតាកាន់កាប់ទឹកដីរបស់រុស្ស៊ី នៅអ៊ុយក្រែន គឺកាន់តែធំទៅៗ។

ISW ក៏បានកត់សម្គាល់ផងដែរថា ក្នុងរយៈពេលប៉ុន្មានថ្ងៃថ្មីៗនេះ លោក Putin បានបើកកិច្ចប្រជុំមួយ ស្តីពីការអភិវឌ្ឍសេដ្ឋកិច្ចសង្គមនៃតំបន់កាន់កាប់ Luhansk, Donetsk, Zaporizhzhia និង Kherson ជាពេលដែលលោក «ជារឿយៗសំដៅទៅអ៊ុយក្រែនដែលត្រូវបានគ្រប់គ្រងថា ជាតំបន់ Donbas និង Novorossiya»។

របាយការណ៍ លើកឡើងទៀតថា កាលពីថ្ងៃទី៣០ ខែមិថុនា ជាការឆ្លើយតប ចំពោះសេចក្តីថ្លែងការណ៍ថ្ងៃទី២៧ ខែមិថុនារបស់អភិបាលក្រុង Odesa លោក Hennadii Trukhanov ដែលថា ទីក្រុង Odesa មិនមែនជាទីក្រុង «របស់រុស្ស៊ី» ហើយមានប្រវត្តិសាស្ត្រផ្ទាល់ខ្លួននោះ អ្នកនាំពាក្យវិមានក្រឹមឡាំង លោក Dmitry Peskov បានអះអាងថា ប្រវត្តិសាស្រ្តនៃទីក្រុង Odesa មានទំនាក់ទំនងដែលមិនអាចកាត់ផ្ដាច់បានជាមួយប្រទេសរុស្ស៊ី។

អ្នកនិពន្ធក៏រម្លឹកផងដែរថា ជំនួយការរបស់លោក Putin គឺលោក Vladimir Medinsky បានប្រកាសថា ជនជាតិរុស្ស៊ី និងអ៊ុយក្រែន គឺជា «ប្រជាជនតែមួយ» ដែលមាន «ស្រុកកំណើតប្រវត្តិសាស្ត្រ« ដោយនេះជាការសំដៅទៅលើ «ដែនដីរុស្ស៊ីបុរាណ នៅសងខាងទន្លេ Dnipro តំបន់ Novorossiya និងគ្រីម៉ា»៕