ក្រសួងការបរទេសរុស្ស៊ី នៅថ្ងៃពុធ (ទី២ ខែកក្កដា) នេះ បានជំរុញឲ្យអាស៊ែបៃហ្សង់ស្តារឡើងវិញនូវទំនាក់ទំនងរបស់ខ្លួនជាមួយទីក្រុងមូស្គូឲ្យដល់កម្រិតមួយដែលសមនឹង «កិច្ចសហប្រតិបត្តិការយុទ្ធសាស្ត្រ» បន្ទាប់ពីបាននិយាយថា កងកម្លាំងមួយចំនួនកំពុងព្យាយាមបំផ្លាញទំនាក់ទំនងរបស់ប្រទេសទាំង២។

គួរបញ្ជាក់ថា ជម្លោះការទូតបានចាប់ផ្តើមផ្ទុះឡើង កាលពីសប្តាហ៍មុន បន្ទាប់ពីពលរដ្ឋអាស៊ែបៃហ្សង់ ២រូប បានស្លាប់ ក្នុងអំឡុងពេលមានការវាយឆ្មក់របស់នគរបាល នៅប្រទេសរុស្ស៊ី ហើយបានឡើងកម្ដៅកាន់តែខ្លាំង បន្ទាប់ពីទីក្រុង Baku ក្រោយមកបានចាប់ខ្លួនអ្នកសារព័ត៌មានរដ្ឋរុស្ស៊ី ២នាក់ និងជនជាតិរុស្សីប្រហែល ១៥នាក់បន្ថែមទៀត ពីបទសង្ស័យជួញដូរគ្រឿងញៀន និងប្រព្រឹត្តឧក្រិដ្ឋកម្មតាមប្រព័ន្ធអ៊ីនធឺណិត។

យ៉ាងណាក្ដី ទំនាក់ទំនងបានស្ថិតនៅក្នុងស្ថានភាពតានតឹង ចាប់តាំងពីចុងឆ្នាំមុនមកម៉្លេះ នៅពេលដែលមនុស្ស ៣៨នាក់ បានបាត់បង់ជីវិត បន្ទាប់ពីយន្តហោះអាស៊ៃបៃហ្សង់ ធ្វើដំណើរពីទីក្រុង Baku ឆ្ពោះទៅភាគខាងត្បូងរុស្ស៊ី បានធ្លាក់។ ទីក្រុង Baku លើកឡើងថា ការធ្លាក់យន្តហោះនោះ គឺដោយសារឧបទ្ទវហេតុដែលបង្កឡើងដោយការបាញ់ពីអង្គភាពការពារដែនអាកាសក្នុងប្រទេសរុស្ស៊ី។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយនៅថ្ងៃពុធនេះថា ទីក្រុងមូស្គូ បាននិងកំពុងកសាងទំនាក់ទំនងជាមួយទីក្រុង Baku អស់រយៈពេលជាច្រើនឆ្នាំមកហើយ ដោយផ្អែកលើការគោរពគ្នាទៅវិញទៅមក ហើយបានបញ្ជាក់ថា តួអង្គខាងក្រៅ ឥឡូវនេះ កំពុងព្យាយាមប្រើស្ថានភាពនេះ ដើម្បី «កេងចំណេញ»។

បន្ទាប់មក លោកស្រីបានលើកឡើងនៅក្នុងសន្និសីទសារព័ត៌មានថា ទីក្រុង Baku គួរតែស្តារទំនាក់ទំនងរបស់ខ្លួនជាមួយរុស្ស៊ីឡើងវិញ ដោយត្អូញត្អែរថា ទីក្រុងមូស្គូមិនមានកុងស៊ុលណាមួយ ដើម្បីចូលទៅទំនាក់ទំនងជាមួយពលរដ្ឋដែលត្រូវបានឃុំខ្លួននៅអាស៊ៃបៃហ្សង់៕