ទីភ្នាក់ងារឧតុនិយមជប៉ុន និយាយនៅថ្ងៃពុធនេះថា កោះដាច់ស្រយាលនៅតំបន់ភាគខាងត្បូងប្រទេសជប៉ុន ត្រូវបានអង្រួនដោយការរញ្ជួយដីជាង ៩០០លើក្នុងរយៈពេល ២សប្តាហ៍ចុងក្រោយនេះ ក្នុងនោះអ្នកស្រុកនិយាយថា ពួកគេលែងបានដេកពួនទៀតហើយ ។

គ្មានការខូចខាតត្រូវបានរាយការណ៍នៅទេពីភាពរំញ័រទាំងនេះ ប៉ុន្តែទីភ្នាក់ងារឧតុនិយមជប៉ុន រាយការណ៍ថា រញ្ជួយដីកម្រិត ៥,៥រ៉ិចទ័រ បានកើតមាននៅម្ដុំកោះ Tokara នៅភាគខាងត្បូងប្រទេស នាថ្ងៃពុធនេះ ។ 

ទីភ្នាក់ងារឧតុនិយមជប៉ុន (JMA) បានឲ្យដឹងថា ហេតុការណ៍រញ្ជួយដីនេះ បានកើតឡើងនៅវេលាម៉ោង ៣ និង២៦នាទីរសៀល ម៉ោងក្នុងស្រុក ក្នុងជម្រៅប្រហែល ១០គីឡូម៉ែត្រ។

លោក Ayataka Ebita គឺជាប្រធានអង្គភាពអង្កេតរលកស៊ូណាមិ និងរញ្ជួយដី និយាយប្រាប់ក្រុមអ្នកសារព័ត៌មានថា សកកម្មភាពរញ្ជួយដី កម្រើកខ្លាំងនៅក្នុងសមុទ្រជុំវិញកោះ Tokara ចាប់តាំងពីថ្ងៃទី ២១ ខែមិថុនារហូតមក ។

លោកបន្តថា មកទល់នឹងវេលាម៉ោង ៤ល្ងាចថ្ងៃពុធនេះ ចំនួនរំញ័រ មានរហូតដល់ ៩០០លើក ។

ខណៈពេលនោះដែរ អាជ្ញាធរណែនាំប្រជាពលរដ្ឋឲ្យប្រុងប្រយ័ត្ន និងតាមដានព័ត៌មានបន្ថែម ហើយព្រមានពីលទ្ធភាពនៃការមានរលករញ្ជួយ។ តាំងពីចុងខែមិថុនាមក រញ្ជួយដីជាបន្តបន្ទាប់ បានកើតមាននៅកោះ Tokara ក្នុងនោះរួមទាំងនៅភូមិ Toshima ផងដែរ៕