អ្នកវិទ្យាសាស្រ្តមួយរូបរបស់អេស្ប៉ាញ បានព្រមាននៅថ្ងៃពុធនេះថា សីតុណ្ហភាពជាប់កំណត់ត្រាថ្មីនៅសមុទ្រមេឌីទែរ៉ាណេនឹងក្លាយជារឿងធម្មតាដោយសារការឡើងកម្តៅផែនដី ។

លោក Justino Martinez គឺជាអ្នកវិទ្យាសាស្រ្តមកពីក្រុមប្រឹក្សាស្រាវជ្រាវវិទ្យាសាស្រ្តជាន់ខ្ពស់អេស្ប៉ាញនិយាយថា មាននូវកំណើនសីតុណ្ហភាព ៤អង្សាសេ នៅសមុទ្រមេឌីទែរ៉ាណេ នៅជិតឆ្នេរតំបន់ Catalan ក្នុងនោះតំបន់មួយចំនួនទៀត បានកើនឡើង ៦អង្សាសេ ពីលើកម្រិតសីតុណ្ហភាពធម្មតា ។

ក្រុមអ្នកស្រុកដែលកំពុងលេងនៅតំបន់ឆ្នេរទីក្រុង Barcelona បានកត់សំគាល់ឃើញផងដែរថា សីតុណ្ហភាពទឹកសមុទ្រ បានកើនឡើង ។

គួរឲ្យដឹងថា រលកកម្ដៅ នៅទូទាំងទ្វីបអឺរ៉ុប ក្នុងសប្តាហ៍នេះ បានបំបែកកំណត់ត្រាសីតុណ្ហភាពខ្ពស់ ដែលបណ្តាលឲ្យមានការបិទសាលារៀន និងបង្កើនហានិភ័យពីការមានអគ្គិភ័យ។

ខណៈពេលនោះដែរ អាជ្ញាធរក្នុងតំបន់ Catalonia បានប្រាប់ឲ្យមនុស្សប្រហែល ១៤.០០០នាក់ បន្តស្នាក់នៅក្នុងផ្ទះសម្បែងរបស់ពួកគេ ដោយសារចំហេះព្រៃចំនួន ២ ដែលបានកើតឡើងស្ទើរតែក្នុងពេលដំណាលគ្នា នៅខេត្ត Lerida ។ 

ភ្នាក់ងារពន្លត់អគ្គិភ័យ និងសង្គ្រោះបន្ទាន់ បានឲ្យដឹងនៅក្នុងសេចក្តីថ្លែងការណ៍មួយថា មួយក្នុងចំណោមអគ្គិភ័យទាំង២ នៅជិតទីក្រុង Cosco មនុស្ស ២នាក់ ត្រូវបានប្រទះឃើញមិនមានជីវិត ដោយអ្នកពន្លត់អគ្គិភ័យ ៕