ភ្នំពេញ៖ ស្ថិតនៅក្នុងស្ថានភាពនៃការរីករាលដាលជំងឺកូវីដ-១៩ ចំនួនកុម្ម៉ង់ទិញទំនិញតាមអនឡាញ មានអត្រាហក់ឡើងខ្ពស់។
លោក ប៉ាត់ ចំណាន ស្ថាបនិក ស៊ូភីអេប តិចណូឡូជី ភីអិលស៊ី លើកឡើងថា នៅក្នុងកិច្ចសម្ភាសន៍ជាមួយ ភ្នាក់ងារសារព័ត៌មាន នៅថ្ងៃទី១០ ខែមីនា ឆ្នាំ២០២១ នេះថា ខណៈដែលរបត់ពិភពលោកបានកំពុងងាកទៅកាន់បដិវត្តន៍ឧស្សាហកម្មទី៤ និងកំពុងអភិវឌ្ឍន៍ប្រើប្រាស់ប្រព័ន្ធបច្ចេកវិទ្យានេះ ជាពិសេសការរីករាលដាលនៃជំងឺកូវីដ-១៩ ប្រព័ន្ធបច្ចេកវិទ្យា បានក្លាយជាតម្រូវការចាំបាច់ ក្នុងការប្រាស្រ័យទាក់ទងគ្នា លើផ្នែកពាណិជ្ជកម្ម និងអាជវីកម្មនានា។
លោកបន្តថា ស្ថិតនៅក្នុងបរិបថនេះ កម្ពុជាកំពុងក្តោបយកការអភិវឌ្ឍន៍ប្រព័ន្ធបច្ចេកវិទ្យា ក្នុងនោះសម្រាប់ការបញ្ជាទិញនានាតាមអនឡាញ ទន្ទឹមគ្នានឹងវិធានការរបស់រាជរដ្ឋាភិបាលជំរុញទប់ស្កាត់ និងការអនុវត្តគម្លាតសង្គម និងការមិនឲ្យចាកចេញពីផ្ទះក្នុងករណីមិនចាំបាច់។ ទីផ្សារកុម្ម៉ង់បញ្ជាទិញតាមអនឡាញរបស់ ស៊ូភីអេប បានកើនឡើងក្នុងរង្វង់ប្រមាណ ២០ ទៅ៣០ ហើយតម្រូវការកម្ម៉ង់ទិញនេះ រំពឹងថានឹងកើនឡើងបន្ថែមទៀត ព្រោះការកុម្ម៉ង់ទិញតាមអនឡាញ គឺបានរហ័សទាន់ចិត្ត និងធ្វើឲ្យអតិថិជនចំណេញពេលវេលាផងដែរ។
ពាក់ព័ន្ធឧស្សាហកម្មទី៤ និងសេដ្ឋកិច្ចឌីជីថល៖ នាពេលកន្លងមកនេះ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែងថា ជំហានដែលកម្ពុជាក្តាប់យក នូវកាលានុវត្តន៍ឧស្សាហកម្មទី៤ និងសេដ្ឋកិច្ចឌីជីថល គឺឈរនៅលើកត្តា៤យ៉ាងរួមមាន៖ ភាពអំណោយផលផ្នែកប្រជាសាស្ត្រ ព្រោះកម្ពុជាមានវត្តមានយុវជនជាច្រើនដែលមានការអប់រំខ្ពស់ និងងាយទទួលយកនូវបច្ចេកវិទ្យាឌីជីថលយ៉ាងឆាប់រហ័ស, ការកើនឡើងយ៉ាងឆាប់រហ័សនៃការប្រើប្រាស់ ទូរស័ព្ទដៃ និងឧបករណ៍វ័យឆ្លាត, ការរីកចម្រើនយ៉ាងឆាប់រហ័សនៃផ្នែកបច្ចេកវិទ្យា តាមរយៈលំហូរវិនិយោគផ្ទាល់ពី បរទេស, និងឥទ្ធផលយ៉ាងលឿននៃឌីជីថលភាវូបនីយកម្ម ដែលកំពុងកើតមាននៅក្នុងគ្រប់វិស័យ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
