ទីក្រុង Kyiv បានព្រមានថា ការផ្អាកផ្ដល់គ្រឿងសព្វាវុធរបស់សហរដ្ឋអាមេរិក នឹងជំរុញឱ្យរុស្ស៊ីអូសបន្លាយសង្គ្រាមនៅអ៊ុយក្រែន ដែលឥឡូវនេះចូលដល់ឆ្នាំទី ៤ ហើយ។ 

កាលពីថ្ងៃអង្គារសប្ដាហ៍នេះ សេតវិមានបាននិយាយថា ខ្លួនបានផ្អាកការផ្គត់ផ្គង់អាវុធមួយចំនួនទៅឲ្យអ៊ុយក្រែន។

អ្នកនាំពាក្យសេតវិមានលោកស្រី Anna Kelly បាននិយាយថា ការសម្រេចចិត្តនេះ ត្រូវបានផ្ដោតលើ ផលប្រយោជន៍របស់អាមេរិកជាធំ បន្ទាប់ពីការត្រួតពិនិត្យរបស់ក្រសួងការពារជាតិអំពីជំនួយ និងការគាំទ្រផ្នែកយោធារបស់សហរដ្ឋអាមេរិកដល់ប្រទេសដទៃទៀត។     

ប្រធានាធិបតីអ៊ុយក្រែនលោក Volodymyr Zelensky បាននិយាយថា ប្រទេសទាំងពីរឥឡូវនេះកំពុង បញ្ជាក់ព័ត៌មានលម្អិតទាំងអស់ស្តីពីការផ្គត់ផ្គង់ ខណៈក្រសួងការបរទេសបានព្រមានថាការពន្យារពេលណាមួយ នឹងក្លាយជាការលើកទឹកចិត្តឱ្យអ្នកឈ្លានពានបន្តសង្រ្គាម និងភេរវកម្ម ជាជាងស្វែងរកសន្តិភាព។

ក្រសួងបានសង្កត់ធ្ងន់ជាពិសេសពីតម្រូវការសម្រាប់ទីក្រុង Kyiv ក្នុងការពង្រឹងការការពារដែនអាកាសរបស់ខ្លួន ខណៈរុស្ស៊ីនៅតែបន្តវាយប្រហារប្រទេសនេះដោយមីស៊ីល និងយានដ្រូន ។

អ្នកការទូតអាមេរិកនៅទីក្រុង Kyiv ត្រូវបានអញ្ជើញទៅក្រសួងការបរទេសសម្រាប់កិច្ចពិភាក្សាកាលពីថ្ងៃពុធសប្ដាហ៍នេះដែរ។

ទោះយ៉ាងណាក៏ដោយ ក្រសួងការពារជាតិរបស់អ៊ុយក្រែនបាននិយាយថា ខ្លួនពុំបានទទួលការជូនដំណឹងជាផ្លូវការណាមួយពីសហរដ្ឋអាមេរិកអំពីការផ្អាក ឬការពិនិត្យឡើងវិញ នៃការផ្គត់ផ្គង់សព្វាវុធនោះទេ ហើយបានជំរុញឱ្យប្រជាជន កុំប៉ាន់ស្មានដោយផ្អែកលើព័ត៌មានតែមួយផ្នែក៕