ទីភ្នាក់ងារស្វែងរកនិងជួយសង្គ្រោះក្នុងតំបន់បាននិយាយថា មនុស្សយ៉ាងហោចណាស់៣នាក់ស្លាប់ និង៥៨នាក់ បានបាត់ខ្លួន បន្ទាប់ពីនាវាចម្លងមួយគ្រឿងបានលិចនៅជិតកោះបាលីជាកោះដ៏ពេញនិយមរបស់ប្រទេសឥណ្ឌូនេស៊ីកាលពីយប់ថ្ងៃពុធ ទី ខែកក្កដា។

ទីភ្នាក់ងារស្វែងរកនិងជួយសង្គ្រោះក្រុង Surabaya បាននិយាយនៅក្នុងសេចក្តីថ្លែងការណ៍នៅថ្ងៃព្រហស្បតិ៍នេះថា «ទិន្នន័យដែលបានបង្ហាញពីប្រតិបត្តិករនាវាចម្លងបានឲ្យដឹងថា មានអ្នកដំណើរសរុបចំនួន៥៣នាក់ និងនាវិក១២នាក់ ហើយនៅលើនាវាចម្លងនេះក៏មានរថយន្តចំនួន២២គ្រឿង ក្នុងនោះមានរថយន្តដឹកទំនិញចំនួន១៤គ្រឿង។

ទីភ្នាក់ងារ បាននិយាយនៅក្នុងសេចក្តីថ្លែងការណ៍មួយនៅពេលក្រោយមកថា មានមនុស្សត្រឹមតែបួននាក់ប៉ុណ្ណោះត្រូវបានជួយសង្គ្រោះនៅព្រឹកព្រលឹមថ្ងៃព្រហស្បតិ៍នេះ។

នាវាចម្លងនេះបានលិចនៅម៉ោងប្រហែល១១:២០នាទីយប់ម៉ោងក្នុងស្រុកកាលពីថ្ងៃពុធ នៅច្រកសមុទ្រកោះបាលី ខណៈនាវាកំពុងធ្វើដំណើរទៅកោះកាន់គោលដៅវិស្សមកាលដ៏ល្បីឈ្មោះពីកោះជ្វាដ៏ធំរបស់ប្រទេសឥណ្ឌូនេស៊ី។

ឧបទ្ទវហេតុតាមសមុទ្រគឺជារឿងកើតឡើងញឹកញាប់នៅក្នុងប្រទេសឥណ្ឌូនេស៊ី ជាប្រជុំកោះនៅអាស៊ីអាគ្នេយ៍ដែលមានកោះប្រហែល១៧.០០០កោះ មួយផ្នែកដោយសារតែស្តង់ដារសុវត្ថិភាពធូររលុង។