មន្ទីរបញ្ចកោណ បាននិយាយកាលពីថ្ងៃពុធទី២ ខែកក្កដា ថាការវាយប្រហាររបស់សហរដ្ឋអាមេរិក កាលពី១០ថ្ងៃកន្លងទៅនេះ បានធ្វើឱ្យកាត់បន្ថយសមត្ថភាពកម្មវិធីនុយក្លេអ៊ែររបស់អ៊ីរ៉ង់រហូតដល់២ឆ្នាំដោយនិយាយថា ប្រតិបត្តិការយោធារបស់សហរដ្ឋអាមេរិក ទំនងជាសម្រេចបាននូវគោលដៅរបស់ខ្លួន ទោះបីជាការវាយតម្លៃដំបូងដ៏ប្រុងប្រយ័ត្នថាត្រូវដើរថយក្រោយយូរជាងនេះឆ្ងាយ។

លោក Sean Parnell អ្នកនាំពាក្យមន្ទីរបញ្ចកោណ បានផ្តល់តួលេខនេះនៅក្នុងសន្និសីទសារព័ត៌មាន ទៅកាន់អ្នកសារព័ត៌មាន និងបាននិយាយថា ការប៉ាន់ស្មានជាផ្លូវការគឺត្រូវកាត់បន្ថយសមត្ថភាព «ប្រហែលជាជិតពីរឆ្នាំ»។

លោក Parnell បាននិយាយថា «យើងបានកាត់បន្ថយសមត្ថភាពកម្មវិធីនុយក្លេអ៊ែររបស់ប្រទេសនេះរយៈពេល១ឆ្នាំទៅ២ឆ្នាំ។ យន្តហោះទម្លាក់គ្រាប់បែករបស់យោធាសហរដ្ឋអាមេរិក បានធ្វើការវាយប្រហារទៅលើរោងចក្រនុយក្លេអ៊ែរអ៊ីរ៉ង់ចំនួនបីកន្លែងកាលពីថ្ងៃទី២២ ខែមិថុនា ដោយប្រើប្រាស់គ្រាប់បែកទម្លុះដីទម្ងន់ជាង១៣.៦០០គីឡូក្រាមជាច្រើនគ្រាប់ និងមីស៊ីលវាយប្រហារស៊ីបគោលដៅ Tomahawk ជាង២០គ្រាប់។

កាលពីចុងសប្តាហ៍កន្លងទៅនេះ ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ លោក Rafael Grossi បាននិយាយថា អ៊ីរ៉ង់ អាចផលិតសារធាតុអ៊ុយរ៉ានីញ៉ូមដែលបានចម្រាញ់រួច ក្នុងរយៈពេលពីរបីខែខាងមុខនេះ ដោយបង្កើនការសង្ស័យអំពីរបៀបនៃការវាយប្រហាររបស់សហរដ្ឋអាមេរិក ថាមានប្រសិទ្ធភាពក្នុងការបំផ្លាញកម្មវិធីនុយក្លេអ៊ែររបស់ទីក្រុងតេអេរ៉ង់។