កូរ៉េខាងជើង គ្រោងបង្កើនចំនួនទាហានរបស់ខ្លួនបីដង ដែលកំពុងប្រយុទ្ធដើម្បីរុស្ស៊ី នៅតាមសមរភូមិជួរមុខជាមួយអ៊ុយក្រែន ដោយបញ្ជូនទាហានបន្ថែមចន្លោះពី២៥.០០០ទៅ៣០.០០០នាក់ ដើម្បីជួយដល់ទីក្រុងមូស្គូ នេះបើយោងតាមការវាយតម្លៃរបាយការណ៍ចារកម្មពីក្រុមមន្ត្រីអ៊ុយក្រែន។

យោងតាមការវាយតម្លៃដែលទូរទស្សន៍ CNN ទទួលបាន ឱ្យដឹងថា កងទ័ពអាចនឹងទៅដល់ប្រទេសរុស្ស៊ីក្នុងប៉ុន្មានខែខាងមុខ ដោយបន្ថែមលើចំនួនកងទ័ពមានស្រាប់១១.០០០នាក់ ត្រូវបានបញ្ជូនកាលពីខែវិច្ឆិកា ដែលបានជួយបណ្តេញការលុកលុយរបស់អ៊ុយក្រែនចូលក្នុងតំបន់ Kursk របស់រុស្ស៊ី។ យោងតាមមន្ត្រីលោកខាងលិចបានឱ្យដឹងថា ទាហានកូរ៉េខាងជើងប្រហែល៤.០០០នាក់        ត្រូវបានសម្លាប់ ឬរងរបួសក្នុងការដាក់ពង្រាយនេះ ប៉ុន្តែកិច្ចសហប្រតិបត្តិការរបស់ទីក្រុងព្យុងយ៉ាងជាមួយទីក្រុងមូស្គូ បានរីកដុះដាលតាំងពីពេលនោះមក។

មន្ត្រីចារកម្មលោកខាងលិចបានបញ្ជាក់ពីការប៉ាន់ប្រមាណនេះ ដោយនិយាយថា ពួកគេបានមើលឃើញព័ត៌មានដាច់ដោយឡែកពីការវាយតម្លៃរបស់អ៊ុយក្រែន ដែលលើកឡើងថាទាហានកូរ៉េខាងជើងថ្មីរហូតដល់៣០.០០០នាក់ អាចត្រូវបានបញ្ជូនទៅប្រទេសរុស្ស៊ី។

ការវាយតម្លៃរបស់អ៊ុយក្រែនដែលCNNទទួលបាន និយាយថា ក្រសួងការពារជាតិរុស្ស៊ី មានលទ្ធភាពផ្តល់គ្រឿងយុទ្ធោបករណ៍ចាំបាច់ អាវុធ និងគ្រាប់រំសេវ ក្នុងគោលបំណង ធ្វើសមាហរណកម្មបន្ថែមទៀតដល់អង្គភាពប្រយុទ្ធរបស់រុស្ស៊ី ។

 ឯកសារនោះបានបន្ថែមថា ពិតជាមានលទ្ធភាពខ្ពស់ណាស់ ដែលកងទ័ពកូរ៉េខាងជើងនឹងចូលរួមក្នុងការប្រយុទ្ធនៅផ្នែកខ្លះនៃអ៊ុយក្រែនដែលកាន់កាប់ដោយរុស្ស៊ី ដើម្បីជួយពង្រឹងសមត្ថភាពកងកម្លាំងរុស្ស៊ី រួមទាំងក្នុងអំឡុងពេលប្រតិបត្តិការវាយលុកទ្រង់ទ្រាយធំផងដែរ៕