សហរដ្ឋអាមេរិក បាននិយាយកាលពីថ្ងៃពុធទី២ ខែកក្កដាថា វាមិនអាចទទួលយកបានទេដែលប្រទេសអ៊ីរ៉ង់ បានជ្រើសរើសវិធីដើម្បីផ្អាកកិច្ចសហប្រតិបត្តិការជាមួយទីភ្នាក់ងារថាមពលអាតូមិកអន្តរជាតិ។

ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា ប្រធានាធិបតីអ៊ីរ៉ង់លោក ម៉ាស៊ូដ ប៉េហ្សេស្គីអាន(Masoud Pezeshkian) បានដាក់ឲ្យចូលជាធរមានកាលពីថ្ងៃពុធនូវច្បាប់មួយដែលត្រូវបានអនុម័តដោយសភាកាលពីសប្តាហ៍មុនដើម្បីផ្អាកកិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ។

អ្នកនាំពាក្យក្រសួងការបរទេសអាមេរិក លោកស្រី Tammy Bruce បាននិយាយក្នុងសន្និសីទសារព័ត៌មានថា នេះមិនអាចទទួលយកបានទេ ហើយទីក្រុងតេអេរ៉ង់ ត្រូវតែសហការយ៉ាងពេញលេញជាមួយទីភ្នាក់ងាររបស់អង្គការសហប្រជាជាតិ ដោយគ្មានការពន្យារពេលបន្តទៀតឡើយ។

ទីភ្នាក់ងារសារព័ត៌មាន Tasnim ពាក់កណ្តាលផ្លូវការរបស់អ៊ីរ៉ង់ បានរាយការណ៍ថា លោកប្រធានាធិបតីបានអនុម័តច្បាប់ដែលតម្រូវឱ្យរដ្ឋាភិបាលផ្អាកទំនាក់ទំនងជាមួយទីភ្នាក់ងារ IAEA ដែលចំណាត់ការនេះ ធ្វើឡើងបន្ទាប់ពីភាពតានតឹងកើនឡើងកាន់តែខ្លាំងរវាងទីក្រុងតេអេរ៉ង់ និងអង្គការឃ្លាំមើលនុយក្លេអ៊ែររបស់អង្គការសហប្រជាជាតិជុំវិញការត្រួតពិនិត្យដំណើរការ និងតម្លាភាព បន្ទាប់ពីមានការប្រឈមមុខដាក់គ្នាដោយយោធាជាមួយអ៊ីស្រាអែល និងសហរដ្ឋអាមេរិក។