ភាគខាងជើង និងខាងលិចប្រទេសចិន កំពុងទប់ទល់នឹងទឹកជំនន់យ៉ាងគំហុក និងបំណាក់ដីដ៏គ្រោះថ្នាក់នៅថ្ងៃព្រហស្បតិ៍ (០៣ កក្កដា) នេះ ខណៈភ្លៀងធ្លាក់ខ្លាំងប្រចាំឆ្នាំ បានបង្កការបំផ្លិចបំផ្លាញទូលំទូលាយ និងជំរុញឱ្យមានការចល័តបុគ្គលិកសង្គ្រោះរាប់ពាន់នាក់ ដើម្បីជួយមនុស្សចេញពីទឹកជំនន់។

ការជូនដំណឹងពណ៌ក្រហមត្រូវបានដាក់ចេញដើម្បីតាមដានភ្លៀងធ្លាក់ខ្លាំង ដែលផ្លាស់ទីពីខេត្ត ស៊ីឈួន (Sichuan) ភាគនិរតី ឆ្លងកាត់ខេត្ត កានស៊ូ (Gansu) ភាគពាយ័ព្យ និងរហូតដល់ខេត្ត ឡាវនីង (Liaoning) ភាគឦសាន ប្រទេសចិន។

ប្រព័ន្ធផ្សព្វផ្សាយរដ្ឋនិយាយថា បុគ្គលិកសង្គ្រោះជាង ១.០០០នាក់ ត្រូវបានបញ្ជូនទៅកាន់ទីប្រជុំជន ថៃភីង (Taiping) ក្នុងខេត្ត ហឺណាន (Henan) ភាគកណ្តាលប្រទេសចិន កាលពីថ្ងៃពុធ បន្ទាប់ពីភ្លៀងធ្លាក់ខ្លាំង បានបណ្តាលឱ្យទឹកទន្លេនៅក្បែរនោះបានហូរហៀរបាក់ច្រាំង ដោយមានការស្លាប់ និងបាត់ខ្លួនមនុស្សជាច្រើននាក់ក្នុងទឹកជំនន់យ៉ាងគំហុក។

គិតត្រឹមព្រឹកថ្ងៃព្រហស្បតិ៍នេះ រថភ្លើងមួយចំនួនចូលទៅក្នុងរដ្ឋធានីប៉េកាំងត្រូវបានផ្អាក ខណៈអាកាសយានដ្ឋានមួយនៃរដ្ឋធានី បានមើលឃើញការពន្យារពេលជើងហោះហើរ និងការលុបចោលជាច្រើន។ ភ្លៀងធ្លាក់ខ្លាំង និងទឹកជំនន់ធ្ងន់ធ្ងរ ដែលអ្នកជំនាញឧតុនិយមផ្សារភ្ជាប់ទៅនឹងបម្រែបម្រួលអាកាសធាតុ កាន់តែបង្កើនជាបញ្ហាប្រឈមដ៏ធំសម្រាប់អ្នកបង្កើតគោលនយោបាយនៅប្រទេសចិន៕