ក្រុមមន្ត្រីជាន់ខ្ពស់របស់អង្គការសហប្រជាជាតិ បានព្រមានកាលពីថ្ងៃពុធ (០២ កក្កដា) ថា ក្រុមជនអន្ធពាលប្រដាប់អាវុធនៅប្រទេសហៃទី ទទួលបាន "ការគ្រប់គ្រងស្ទើរតែទាំងស្រុង" នៃរដ្ឋធានីព័រអូប្រាំង ហើយអាជ្ញាធរមិនអាចបញ្ឈប់ការកើនឡើងនៃអំពើហិង្សាដ៏អាក្រក់នៅទូទាំងប្រទេសសមុទ្រការ៉ាអ៊ីបដ៏ក្រីក្រនេះបានទេ។

លោកស្រី លោក Ghada Fathy Waly នាយកប្រតិបត្តិនៃការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម បានប្រាប់ក្រុមប្រឹក្សាសន្តិសុខអង្គការសហប្រជាជាតិថា តួលេខប៉ាន់ស្មាន ៩០% នៃទឹកដីរដ្ឋធានីព័រអូប្រាំង ឥឡូវនេះស្ថិតនៅក្រោមការគ្រប់គ្រងរបស់ក្រុមឧក្រិដ្ឋជន ដែលកំពុងពង្រីកការវាយប្រហាររបស់ខ្លួន មិនត្រឹមតែចូលទៅក្នុងតំបន់ជុំវិញនោះទេ ប៉ុន្តែលើសពីនេះទៅទៀតក្នុងតំបន់ធ្លាប់មានសន្តិភាពពីមុន។

លោកស្រី Waly និយាយថា សិទ្ធិអំណាចរបស់រដ្ឋក្នុងការគ្រប់គ្រងកំពុងធ្លាក់ចុះយ៉ាងឆាប់រហ័ស នៅពេលក្រុមជនអន្ធពាលបានពង្រីកកម្លាំងជាមួយនឹងផលប៉ះពាល់ជាបន្តបន្ទាប់។ លោកស្រីបន្ថែមថា ក្រុមឧក្រិដ្ឋជនទាំងនោះកំពុងឈានជើងចូលទៅក្នុងទីតាំងទំនេរ ដែលអវត្តមានសន្តិសុខ ឬការផ្តល់សេវាសាធារណៈមានកំណត់ ហើយកំពុងបង្កើត "រចនាសម្ព័ន្ធអភិបាលកិច្ចស្របគ្នា" តាមជាក់ស្ដែងមួយ។

ឧបការីអគ្គលេខាធិការអង្គការសហប្រជាជាតិ លោក Miroslav Jenca បានប្រាប់ក្រុមប្រឹក្សាថា "ការឡោមព័ទ្ធដែលកំពុងបន្តរបស់ក្រុមជនអន្ធពាលលើទីក្រុងព័រអូប្រាំង" និងការពង្រឹងមូលដ្ឋានរបស់ពួកគេនៅក្នុងរដ្ឋធានី និងលើសពីនេះ គឺ "ជំរុញឱ្យស្ថានការណ៍កាន់តែខិតជិតមាត់ជ្រោះដ៏គ្រោះថ្នាក់"៕