សមាជិកសភារបស់ចក្រភពអង់គ្លេស បានបោះឆ្នោតកាលពីថ្ងៃពុធ ទី២ ខែកក្កដា ដើម្បីហាមឃាត់ក្រុម Palestine Action នៃយុទ្ធនាការគាំទ្រប៉ាឡេស្ទីន ថាជាអង្គការភេរវកម្ម បន្ទាប់ពីសកម្មជនរបស់ក្រុមនេះបានសម្រុកចូលមូលដ្ឋានយោធា និងធ្វើឱ្យខូចខាតយន្តហោះចំនួនពីរគ្រឿងក្នុងការតវ៉ានូវអ្វីដែលក្រុមនេះនិយាយថាជាការគាំទ្ររបស់ចក្រភពអង់គ្លេសសម្រាប់អ៊ីស្រាអែល។

ក្រុម Palestine Action ដែលចាត់ទុកខ្លួនឯងថាជាចលនាសកម្មភាពផ្ទាល់ បានប្រើប្រាស់វិធីសាស្ត្ររំខាន ដាក់គោលដៅលើក្រុមហ៊ុនជាច្រើននៅក្នុងប្រទេសអង់គ្លេសដែលមានទំនាក់ទំនងជាមួយអ៊ីស្រាអែល រួមទាំងក្រុមហ៊ុនសម្រាប់ការពារជាតិអ៊ីស្រាអែល Elbit Systems ដែលខ្លួនបានចាត់ទុកថាជា «គោលដៅចម្បង»។

រដ្ឋាភិបាលការងាររបស់ចក្រភពអង់គ្លេស បានចោទប្រកាន់ក្រុមនេះថាបានបង្កការខូចខាតគិតជាទឹកប្រាក់រាប់លានផោនតាមរយៈសកម្មភាពនៅរោងចក្រ Thales TCFP.PA ក្នុងឆ្នាំ២០២២ ជាទីតាំងរបស់ក្រុមហ៊ុន Elbit កាលពីឆ្នាំមុន និងនៅមូលដ្ឋានទ័ពអាកាស Royal Air Force នៅភាគខាងត្បូងប្រទេសអង់គ្លេសកាលពីខែមុន ជាការជំរុញក្នុងការសម្រេចចិត្តហាមឃាត់ដល់ក្រុមនេះ។

ការហាមឃាត់នេះ នឹងចាត់ទុកជាផ្លូវការ ក្រុមPalestine Action ថាជាអង្គការភេរវកម្ម ដូចគ្នាទៅនឹងក្រុមរដ្ឋអ៊ីស្លាម ឬក្រុមអាល់កៃដា ក្រោមច្បាប់របស់អង់គ្លេស។ 

ទន្ទឹមនឹងនេះ ក្រុមអ្នកតវ៉ា បានមកប្រមូលផ្តុំគ្នានៅខាងក្រៅផ្លូវការិយាល័យ Downing Street ក្នុងទីក្រុងឡុងដ្រ៏កាលពីថ្ងៃពុធ ដើម្បីប្រឆាំងនឹងបម្រាមដែលបានស្នើឡើងដាក់ទៅលើក្រុម Palestine Action។ មនុស្សរាប់រយនាក់បានចូលរួមក្នុងការតវ៉ាដែលរៀបចំដោយយុទ្ធនាការសាមគ្គីភាពប៉ាឡេស្ទីន ដែលត្រូវបានបំបែកដោយនគរបាល។