បេសកជនពិសេសរបស់អង្គការសហប្រជាជាតិទទួលបន្ទុកប្រទេសយេម៉ែនលោក Hans Grundberg កាលពីថ្ងៃពុធ បានអំពាវនាវឲ្យមាន «ដំណោះស្រាយនយោបាយ»មួយចំពោះជម្លោះ ដែលអូសបន្លាយក្នុងប្រទេសយេម៉ែន។

បេសកជនពិសេសរូបនេះ បានធ្វើការអត្ថាធិប្បាយនៅក្នុងសេចក្តីថ្លែងការណ៍មួយ ដែលត្រូវបានចេញផ្សាយ ខណៈដែលលោកបានបញ្ចប់ដំណើរទស្សនកិច្ចរយៈពេលបីថ្ងៃ ទៅកាន់ទីក្រុងកំពង់ផែ Aden ភាគខាងត្បូង។

ក្នុងអំឡុងពេលទស្សនកិច្ចរបស់ខ្លួន  លោកបេសកជនUN បានជួបជាមួយនាយករដ្ឋមន្ត្រីយេម៉ែនលោក Salem Bin Buraik និងបានចូលរួមពិភាក្សាជាមួយសមាជិកសង្គមស៊ីវិល និងមេដឹកនាំស្ត្រីមកពីគណបក្សនយោបាយ និងសមាសភាពផ្សេងៗ។

លោក Grundberg បានលើកឡើងថា ភាគីពាក់ព័ន្ធទាំងអស់ មានការទទួលខុសត្រូវក្នុងការផ្លាស់ប្តូរប្រទេសយេម៉ែនពីស្ថានភាព «គ្មានសង្រ្គាម គ្មានសន្តិភាព» ឆ្ពោះទៅរកដំណោះស្រាយរយៈពេលវែង តាមរយៈសកម្មភាពដែលអាចទុកចិត្តបាន ការដឹកនាំប្រកបដោយការទទួលខុសត្រូវ និងការប្តេជ្ញាចិត្តពិតប្រាកដចំពោះសន្តិភាព»។

លោកបេសកជនអង្គការសហប្រជាជាតិ បានស្វាគមន៍កិច្ចខិតខំប្រឹងប្រែងសម្រាប់ការកាត់បន្ថយការកើនឡើង នៅទូទាំងជួរមុខ និងបានលើកទឹកចិត្តដល់ការបង្កើតគណៈប្រតិភូចរចាគ្រប់ជ្រុងជ្រោយរួម ដោយ   រដ្ឋាភិបាលយេម៉ែន ដើម្បីរៀបចំសម្រាប់ការចរចា នាពេលខាងមុខ។

លោក Grundberg ក៏បានលើកឡើងពីការព្រួយបារម្ភអំពីបុគ្គលិកUN និងអង្គការក្រៅរដ្ឋាភិបាលដែលត្រូវបានឃុំខ្លួន ដោយសង្កត់ធ្ងន់ថា ការឃុំខ្លួនបែបនេះ ធ្វើឲ្យប៉ះពាល់ដល់ការជឿទុកចិត្ត និងកិច្ចខិតខំប្រឹងប្រែងកសាងទំនុកចិត្តដែលចាំបាច់សម្រាប់ដំណើរការសន្តិភាព។