អង្គការសុខភាពពិភពលោក WHO កំពុងជំរុញប្រទេសនានាទូទាំងសកលលោកឱ្យដំឡើងថ្លៃភេសជ្ជៈដែលមានជាតិស្ករខ្ពស់ អាល់កុលឬគ្រឿងស្រវឹង និងថ្នាំជក់ ក្នុងអត្រា ៥០% សម្រាប់រយៈពេល ១០ឆ្នាំខាងមុខ តាមរយៈការយកពន្ធខ្ពស់ៗ ដែលជាការគាំទ្រខ្លាំងបំផុតរបស់ស្ថាប័នមួយនេះសម្រាប់ពន្ធអាករ ដើម្បីជួយដោះស្រាយបញ្ហាសុខភាពសាធារណៈរ៉ាំរ៉ៃ។

ទីភ្នាក់ងារសុខភាពរបស់អង្គការសហប្រជាជាតិនេះនិយាយថា វិធានការបង្កើនតម្លៃនេះនឹងជួយកាត់បន្ថយការប្រើប្រាស់ផលិតផល ដែលរួមចំណែកដល់ជំងឺគ្រោះថ្នាក់ជាច្រើនដូចជាទឹកនោមផ្អែម និងមហារីកមួយចំនួន ក៏ដូចជាការរៃអង្គាសប្រាក់ទុកនៅពេលជំនួយអភិវឌ្ឍពិភពលោកកំពុងធ្លាក់ចុះ និងបំណុលសាធារណៈកើនឡើង។

លោកវេជ្ជបណ្ឌិត Jeremy Farrar ជំនួយការអគ្គនាយកនៃការលើកកម្ពស់សុខភាព និងការបង្ការ និងគ្រប់គ្រងជំងឺរបស់ WHO បាននិយាយថា "ពន្ធសុខភាពគឺជាឧបករណ៍ដ៏មានប្រសិទ្ធភាពបំផុតមួយ ហើយក៏ដល់ពេលធ្វើសកម្មភាពលើរឿងនេះដែរ"។

គំនិតផ្តួចផ្តើម "៣គុណនឹង៣៥" របស់ WHO នេះមានបំណងកាត់បន្ថយការប្រើប្រាស់ផលិតផលដែលបង្កគ្រោះថ្នាក់ និងបង្កើតប្រាក់ចំណូលរបស់រដ្ឋ។ WHO ប៉ាន់ប្រមាណថា គំនិតផ្តួចផ្តើមពន្ធអាករនោះអាចរៃអង្គាសប្រាក់បាន ១សែនកោដិដុល្លារនៅឆ្នាំ២០៣៥ ដោយផ្អែកលើភស្តុតាងជាក់ស្ដែងនៃពន្ធសុខភាពនៅក្នុងប្រទេសនានាដូចជាកូឡុំប៊ី និងអាហ្វ្រិកខាងត្បូង ជាដើម៕