បាល់ទាត់៖ ក្លិបអាស៊ីអឺរ៉ុបដែលជាក្រុមបាល់ទាត់មកពីគ្រឹះស្ថានអប់រំឧត្តមសិក្សាតែមួយគត់របស់ប្រទេសកម្ពុជា សាកលវិទ្យាល័យអាស៊ីអឺរ៉ុបនៅលេងលីគកំពូលបាល់ទាត់នឹងពិចារណាមិនចូលរួមលេងលីគទី២ ទេ ករណីក្រុមហ៊ុនលីគធ្វើការកាត់ចេញពីលីគកំពូលសម្រាប់ឆ្នាំ២០២២។ នេះបើតាមការឱ្យដឹងពីមន្ត្រីក្លិបលោក ផេង ចាន់ណា។
លោកបន្ថែមថា កន្លងមកក្រុមហ៊ុនលីគបានវាយតម្លៃដាក់ពិន្ទុក្លិបទាំង១២ ដែលត្រូវបន្តលេងលីគរដូវកាល២០២២ តាមបទបញ្ជាការប្រកួតឆ្នាំចាស់ដោយពិនិត្យលើ ៥ចំណុចធំៗ ដែលក្លិបត្រូវតែមាននោះគឺក្លិបអាស៊ីអឺរ៉ុបស្ថិតនៅក្រោមគេទាំងអស់ទទួលបានតែ ៦ពិន្ទុតែប៉ុណ្ណោះ ខណៈក្លិបផ្សេងៗទៀតបានពិន្ទុ ៥០ឡើងឯណោះ។ អាស៊ីអឺរ៉ុបទទួលស្គាល់ថា ក្លិបរបស់ខ្លួននៅមានកម្រិតមានការខ្វះខាត់ច្រើន តែពួកយើងមានឆន្ទៈចូលរួមអភិវឌ្ឍវិស័យបាល់ទាត់តាមរយៈការអប់រំកម្រិតឧត្តមសិក្សា ពង្រឹងសមត្ថភាពកីឡាករ ជំរុញឱ្យធនធានកីឡាករក្នុងស្រុកបង្កើនកម្រិតកាន់តែខ្ពស់។ បើនិយាយពីការអនុវត្តបទបញ្ញាការប្រកួត រូបមន្តប្រកួត យើងមិនច្បាស់លាស់ដែលថាក្លិបលេខរៀងពិន្ទុចុងក្រោយត្រូវកាត់ទៅលីគទី២ ហើយក្រុមដែលជាប់លីគទី២ ត្រូវឡើងទៅលេងលីគកំពូល នោះត្រូវក្រុមហ៊ុនលីគពិចារណាវាយតម្លៃតាមលក្ខខណ្ឌថា អនុញ្ញាតលេងបានរឺអត់ទៀត។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាធ្លាប់បានឲ្យដឹងថា ជាមួយការពិចារណាបេក្ខភាពលីគកំពូលនារដូវកាលថ្មីនេះ ក្រុមហ៊ុនលីគបានផ្ដោតលើលក្ខណៈវិនិច្ឆ័យ ៥ចំណុចសំខាន់ៗ ទី១-កិច្ចការរដ្ឋបាលលរបស់សមាគម/ក្លិប ទី២-បញ្ញាចំណូល-ចំណាយ ទី៣-បញ្ហាច្បាប់ ទី៤-បញ្ហាហេដ្ឋារចនាសម្ព័ន្ធ និងទី៥ ដែលពិសេស និងខ្វះមិនបានគឺបញ្ហាហិរញ្ញវត្ថុ។ អ្នកគាំទ្របាល់ទាត់មួយចំនួនសម្តែងនូវការសោកស្តាយ ប្រសិនបើអាស៊ីអឺរ៉ុបដកខ្លួនពីបាល់ទាត់លីកកម្ពុជា ហើយធ្វើឱ្យគេនឹកដល់ក្លិបរបស់សាកលវិទ្យាល័យបៀលប្រាយដែលជោគជ័យច្រើន និងមានកីឡាករល្អៗ និងសាកលវិទ្យាល័យវេសស្ទើនដកខ្លួនពីបាល់ទាត់ជាតិដោយសារបញ្ហាហិរញ្ញវត្ថុ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
